The Telegraph-ის ცნობით, იმ შემთხვევაში, თუ "იუნაიტედი" ვერ მოახერხებს ევროტურნირებზე გასვლას, კლუბი მსოფლიოს მასშტაბით მოაწყობს ტურნეებს და ევროტურნირებზე მისაღები პოტენციური თანხის კომპენსაციას ამხანაგური მატჩებიდან შეეცდება.

ყველაზე დაბალი შეფასების მიხედვით, ჩემპიონთა ლიგის გარეშე დარჩენილი "იუნაიტედი" სულ ცოტა 30 მლნ. ფუნტს დაკარგავს.

ამავდროულად აშშ-ში დაგეგმილი ტურნე, რომლის დროსაც "იუნაიტედი" 5 მატჩს ჩაატარებს, "წითელი ეშმაკების" ყულაბაში 12 მლნ. ფუნტს შეიტანს. 2008 წელს საუდის არაბეთის გუნდმა, "ალ-ჰილალმა" 2 მლნ. ფუნტი გადაუხადა "იუნაიტედს" რათა ამ ორ კლუბს ამხანაგური მატჩი ჩაეტარებინათ.

"იუნაიტედის" ხელმძღვანელობას იმედი აქვს, რომ წელსაც იქნება ასეთი შემოთავაზებები და როგორც ევროპაში, ასევე მის საზღვრებს გარეთ ჩატარებული ამხანაგური შეხვედრები ევროპის ლიგაზე, ან ჩემპიონთა ლიგაზე ვერ მოხვედრის გამო პოტენციური თანხის კომპენსირების საშუალება გახდება.

აღსანიშნავია, რომ მომავალ სეზონში ევროთასებს შესაძლოა სხვა დიდი კლუბებიც დააკლდნენ: "ლიონი", "პსვ", "მილანი" და "ვალენსია". თითოეული მათგანი შესაძლოა "იუნაიტედის" პოტენციური მოწინააღმდეგეები გახდნენ.

fapl.ru