"მანჩესტერ სიტის" თავკაცის თქმით, ამ დროისათვის ქალაქ მანჩესტერს ერთადერთი ტოპ-კლუბი ჰყავს.
"ქალაქელები" ოთხივე ტურნირზე იბრძვიან, მაშინ როცა "მანჩესტერ იუნაიტედი" ინგლისის თასიდან და ლიგის თასიდან გამოვარდა, პრემიერ-ლიგაში კი მხოლოდ მე-7 პოზიციაზე იმყოფება.
ჩილელი სპეციალისტი, რომლის ქვეშევრდომებმაც სექტემბერში გამართულ მანჩესტერულ დერბიში 4:1 დაამარცხეს "წითელი ეშმაკები", თვლის, რომ მისმა გუნდმა ტიტულიანი მეზობელი მთლიანად ჩაძირა.
"თუ მხოლოდ ამ სეზონს გადავხედავთ, მანჩესტერს მხოლოდ ერთი ტოპ კლუბი ჰყავს და ეს ჩვენ ვართ. თუმცა არ შეიძლება იმის დავიწყება, რასაც "იუნაიტედმა" მიაღწია წინა წლებში. ჩვენ ვცდილობთ სხვადასხვა თასების მოგებით გავიზარდოთ - და არამხოლოდ შიდა ჩემპიონატში, არამედ საერთაშორისო არენაზეც."
"ამ სეზონში ჩვენ ოთხივე ტიტულისთვის ვიბრძვით. ჩვენ მომთმენები უნდა ვიყოთ, რადგანაც არ შეიძლება შემადგენლობის ყოველდღიურად შეცვლა. ჩვენ ჩვენი სათამაშო ფილოსოფია უნდა შევინარჩუნოთ და ამისთვის მოთმენაა საჭირო" - ციტირებს პელეგრინის სიტყვებს ESPN.