სერ ალექს ფერგიუსონის უკანასკნელი შენაძენისგან ყველა გასაოცარ მატჩებს მოელოდა "იუნაიტედის" მაისურით, თუმცა უილფრიდ ზაჰამ მხოლოდ 4 მატჩში მიიღო მონაწილეობა, მას შემდეგ რაც მან 15 მილიონად "კრისტალ პალასი" დატოვა. ახლა კი, იგი არენდის საშუალებით "კარდიფ სიტის" ფეხბურთელად ითვლება მიმდინარე სეზონის ბოლომდე.
უილფრიდს შესანიშნავი დებიუტი ჰქონდა უელსურ კლუბში, რამაც მითქმა-მოთქმა გამოიწვია, თუ რატომ არ ეძლეოდა შანსი "იუნაიტედში." თუმცა დევიდ მოიესი განმარტავს, რომ ზაჰას კონკურენტები: იანუზაი, ნანი, ვალენსია, იანგი და შინჯი კაგავა არიან ამაში "დამნაშავენი", რადგან ისინი ყოველთვის იბრძვიან ძირითად შემადგენლობაში მოსახვედრად.
"შენ დარწმუნებული უნდა იყო იმაში, რომ ყველაფერს ნათლად ხედავ." აცხადებს მოიესი. "მის პოზიციაზე მაღალი კონკურენციაა გუნდში. როდესაც აქ მოვედი, მე დამხვდა ანტონიო ვალენსია, ეშლი იანგი და ნანი. შემდეგში დაგვჭირდა ადნან იანუზაი და ასევე შინჯი კაგავა, რომელსაც ფლანგზე თამაშიც ასევე კარგად გამოსდის."
"მე ვხედავდი თუ როგორ ვარჯიშობდა ზაჰა ყოველდღე. ეს მხოლოდ ჩვენ ვიცოდით. ჩვენ შეგვეძლო უფრო ადრე მისი არენდით გაშვება, მაგრამ ნანის ტრავმის გამო თავს ვიკავებდით. საბოლოო ჯამში ეს კარგია მისთვის (ზაჰასთვის), ეს კარგია მისი გაუმჯობესებისთვის. ყველას ექნება შესაძლებლობა, რომ ნახოს მისი თამაში. მთავარი არსი იმაში დევს, რომ მან დაამტკიცოს თავისი შესაძლებლობები და გუნდში უფრო ძლიერი დაბრუნდეს." - დაასრულა მოიესმა.