რაფაელი ფიქრობს, რომ სერ ალექს ფერგიუსონის წასვლის შემდეგ გუნდში სიტუაცია ცოტა გართულდა. თუმცა აცხადებს, რომ ის და მისი თანაგუნდელები გვერდში უდგანან დევიდ მოიესს.

ბოლო დროს "წითლები" კრიტიკის ქარ-ცეცხლში მოეცვნენ, მას შემდეგ რაც მიყოლებით სამჯერ დამარცხდნენ. შაბათს კი მოიპოვეს პირველი გამარჯვება 2014 წელს, "სუონსის" წინააღმდეგ.

ჟურნალისტებთან საუბრის დროს, რაფაელმა აღნიშნა, რომ ის და მისი თანაგუნდელები ერთმანეთს მხარში უდგანან ამ რთულ პერიოდში.

"ჩვენ ერთად ვართ." - განაცხადა ბრაზილიელმა. "ვიცოდით, რომ დიდი ცვლილებები გველოდა. წავიდა მენეჯერი, რომელიც 27 წელი უცვლელი იყო. ეს აუცილებლად შექმნიდა დიდ პრობლემებს. ჩვენ უნდა გავითვალისწინოთ ის, რასაც დევიდ მოიესი გვეუბნება და მოედანზე გამოვიყენოთ. მოიესს ძლიერი მენტალიტეტი აქვს, ის თავის საქმეს კარგად აკეთებს და ეს ჩვენ პოზიტიურად უნდა გამოვიყენოთ."

როცა მას ჰკითხეს ეკისრებოდათ თუ არა ფეხბურთელებს ასეთი ცუდი სერიის პასუხისმგებლობა, მან უპასუხა: "100 პროცენტით გეთანხმებით. მთელი პასუხისმგებლობა მხოლოდ ჩვენზეა. არ მესმის რატომ უყურებს ყველა მენეჯერს. მხოლოდ ფეხბურთელებს ევალებათ მოედანზე საქმის გაკეთება. უნდა გავაგრძელოთ ისე თამაში, როგორც ეს შაბათს მეორე ტაიმში მოვახერხეთ."

"ამაზე ბევრი ვილაპარაკეთ გასახდელში. ჩვენ საკუთარი დონე უნდა დავანახოთ ყველას. ხალხი ამბობს, რომ "იუნაიტედს" არ ჰყავს კარგი შემადგენლობა. უნდა ვანახოთ, რომ ეს არ არის მართალი."

ასევე რაფაელმა აღნიშნა, რომ სურს გუნდს დაეხმაროს მოგების სერიის გაგრძელებაში "სუონსის" დამარცხების შემდეგ და შეინარჩუნოს სტაბილურობა სეზონის ასეთ მნიშვნელოვან ეტაპზე.

"ძალიან გახარებული ვარ ამ გამარჯვებით. მიყოლებით სამი მატჩის წაგება, აქედან ორის "ოლდ ტრაფორდზე", ნამდვილად არ არის ნორმალური. შაბათს, მეორე ტაიმში ყველას დავანახეთ ნამდვილი სახე."

"ჩვენ უნდა შევინარჩუნოთ სტაბილურობა. თუ გვსურს, რომ მოვიგოთ ტიტული ან ოთხეულში მოვხვდეთ, ყველა თამაში ასე უნდა ვითამაშოთ."

წყარო: ManUtd.com