როგორც გამოცემა Daily Mail იუწყება, "სუონსისთან" პრემიერ ლიგის მატჩს არ დაესწრება "იუნაიტედის" ყოფილი მწვრთნელი, ალექს ფერგიუსონი. "წითელი ეშმაკების" ყოფილი თავკაცი ერთი კვირით ოჯახთან ერთად კარიბის ზღვაზე დასასვენებლად გაემგზავრა. სერ ალექსის ოჯახმა იზეიმა ორი დაბადების დღე რამდენიმე კვირის წინ. ბრიტანული გამოცემების თანახმად, ფერგიუსონს დაახლოებით 30 კაციანი "დელეგაცია" გაყვა თან. თავად შოტლანდიელი ლეგენდა კრიტიკის ქარ-ცეცხლში გაეხვა. როგორც ცნობილია, ის "იუნაიტედის" ყველა მატჩს დაესწრო მიმდინარე სეზონში. ბევრის აზრით, ეს უარყოფით გავლენას ახდენს დევიდ მოიესსა და ფეხბურთელებზე.
დევიდ მოიესი ამ მოსაზრებას არ დაეთანხმა:"ვინც ამ ყველაფერზე საუბრობს, არ იცნობს ვითარებას კარგად. ხალხი არ იცნობს სერ ალექსს და არ მიცნობს მე. ეს ფაქტია. რატომ უნდა თქვა ასეთი რამ? მისგან დიდი მხარდაჭერა იგრძნობა და ის ტრიბუნებზე მხოლოდ იმისთვისაა, რომ დამეხმაროს. მე მასთან საუბრები მაქვს ხოლმე და ყოველი მატჩის შემდგომ სურვილი მაქვს 2-3 წუთით გავესაუბრო."