უელბეკი - "იუნაიტედის" საიდუმლო იარაღი.
მიძინებული ფორვარდი გამოცოცხლდა და გუნდისთვის მნიშვნელოვანი ფიგურა გახდა.
ძალიან მნიშვნელოვანია გრძელი და ხარისხიანი სკამის ყოლა. "მანჩესტერ იუნაიტედი" კი კმაყოფილი უნდა იყოს დენი უელბეკის ყოლით სათადარიგო შემადგენლობაში.
ყველა ფიქრობდა, რომ უეინ რუნის პერსის გარეშე ძალიან გაუჭირდებოდა. მთელი პასუხისმგებლობა ახლა უკვე მხოლოდ მის მხრებზე იყო, მაგრამ გამოჩნდა დენი უელბეკი, რომელმაც საკმაოდ კარგად მოახერხა ჰოლანდიელის შეცვლა, შეუმსუბუქა რუნის ტვირთი და გუნდისთვის სასიცოცხლო მნიშვნელობის როლიც კი ითამაშა ბოლო რამდენიმე მატჩში.
ის შესანიშნავი იყო ყოფილი კლუბისთვის "ნორვიჩისთვისაც". მართალია დენი ვერ ხვდებოდა სასტარტო შემადგენლობაში, თუმცა მეორე ტაიმში შემოსული ინგლისელი თითქმის ყოველთვის ახერხებდა გოლის გატანას. ცუდი სეზონის შემდეგ კი, წელს, დენიმ ძალიან კარგი თამაში აჩვენა და ბოლო ოთხ მატჩში ოთხი გოლი გაიტანა "იუნაიტედისთვის".
სერ ალექს ფერგიუსონის დროს, უელბეკი ძალიან ბევრს იბრძოდა გოლის გასატანად. ახლა კი უკვე დევიდ მოიესი აიძულებს მას ამის გაკეთებას. როგორც წინა სტატიებში მოგახსენეთ, მოიესმა ურჩია ახალგაზრდა ფორვარდს, რომ რუნისგან აეღო მაგალითი და ემუშავა მეტი. უელბეკმაც არ დააყოვნა, ყოველი ვარჯიშის მერე რჩებოდა, მუშაობდა ყოველგვარ კომბინაციებზე და როგორც ხედავთ შედეგი უკვე სახეზეა.
ნამდვილად დიდებულია, როცა ფანებს ესმით როგორ ამხნევებს მენეჯერი თავის ფეხბურთელებს, როგორ გვერდში უდგას მათ და მოუწოდებს მეტი მუშაობისკენ. ეს ყველაფერი კი შემდეგში გასაოცარ შედეგს გვაჩვენებს. მართალია ლეგენდები არ ხდებიან მხოლოდ ოფლის ხარჯზე, მაგრამ ტალანტთან ერთად ბევრი მუშაობაც აუცილებელია.
დეკემბრის დასაწყისიდან მოყოლებული, უელბეკმა გაიტანა ორჯერ მეტი გოლი, ვიდრე დანარჩენ სეზონში და მისი დარტყმის სიზუსტეც 10 პროცენტით გაიზარდა.
ასე თანდათანობით, ბევრი მუშაობით, უელბეკი უკვე ახერხებს საკუთარი ადგილის მოპოვებას გუნდში და ის კლუბისთვის ერთ-ერთი მნიშვნელოვანი ფიგურა ხდება.
DailyMail.co.uk