ძალიან საინტერესო და მოულოდნელობებით სავსე გამოდგა 2013 წელი "მანჩესტერ იუნაიტედისთვის". ამ წლის განმავლობაში მათ მოახერხეს მეოცე "პრემიერ ლიგის" მოგება, თუმცა ამ დიდ სიხარულთან ერთად ძალიან სამწუხარო ამბავიც გაიგეს. 26 წლიანი კარიერის შემდეგ გუნდი დატოვა სერ ალექს ფერგიუსონმა, მისი შემცვლელი კი დევიდ მოიესი აღმოჩნდა. ასევე უკვე მეორედ საფეხბურთო კარიერა დაამთავრა ინგლისელმა ნახევარმცველმა პოლ სქოუზმა.

ფერგიუსონის წასვლით დასრულდა ყველაზე გრძელვადიანი და წარმატებული მწვრთნელის კარიერა ინგლისის ფეხბურთის ისტორიაში. შოტლანდიელმა 26 წლიან კარიერაში შეძლო 13 პრემიერ ლიგის, 5 ინგლისის თასის, ორი ჩემპიონთა ლიგის, 4 ლიგის თასის, ერთი თასების მფლობელთა თასი, ერთი სუპერ თასის, ერთი ინტერკონტინენტური თასის და ერთი კლუბების მსოფლიო ჩემპიონატის მოგება. სწორედ ასეთმა ფანტასტიურმა კარიერამ განაპირობა ის, რომ მისი შეცვლა პრაქტიკულად შეუძლებელია და ეს მოიესის პირველ სეზონში კარგად ჩანს.

აღმასვლები და ჩავარდნები

სეზონის საუკეთესო მომენტი რა თქმა უნდა, "მანჩესტერ სიტის" 11 ქულით ჩამოტოვება და მეოცე "პრემიერ ლიგის" ტიტულის მოგებაა, ყველაზე სამწუხარო მომენტი კი პრემიერ ლიგის მოგებამდე რამდენიმე დღით ადრე გავრცელებული განცხადებაა, სერ ალექს ფერგიუსონის წასვლის შესახებ.

თუმცა ამ წელს კიდევ ერთი ძალიან სამწუხარო გამოცდილება მიიღეს "იუნაიტედის" გულშემატკივრებმა და ეს მოხდა "ჩემპიონთა ლიგის" მეთექვსმეტედ ფინალში, "რეალ მადრიდის" წინააღმდეგ "ოლდ ტრაფორდზე". პირველი ტურის შემდეგ "ოცნებების თეატრი" ძალიან კარგი განწყობით ხვდებოდა "რეალთან" მატჩს, რადგან მათ მადრიდში სასურველი შედეგი (1-1) დააფიქსირეს. კარგი განწყობა მატჩშიც აისახა და "იუნაიტედი" დაწინაურდა, თუმცა ერთმა მომენტმა მთლიანად შეცვალა მატჩის ბედი. თურქმა არბიტრმა ძალიან საეჭვო გადაწყვეტილება მიიღო და მოედნიდან გააძევა ლუიშ ნანი. საბოლოოდ ეს მომენტი გადამწყვეტი აღმოჩნდა და "იუნაიტედი" დამარცხდა.



ამ თამაშის შემდეგ ფერგიუსონმა ვერ შეძლო ნერვების მოთოკვა და მან უარი თქვა მატჩის შემდგომ პრესკონფერნციაზე დასწრებაზე. ალბათ ის უკვე ხვდებოდა, რომ მისი კარიერა სრულდებოდა და მისი ბოლო შანსი "ჩემპიონთა ლიგის" კიდევ ერთხელ მოგებისა საბოლოოდ გაქრა.

ბოლო ჩავარდნა კი "იუნაიტედს" სატრანსფერო პერიოდში ჰქონდა, მათ ვერ მოახერხეს ამ პერიოდის გამოყენება და მხოლოდ მარუან ფელაინი შეიძინეს, რომელმა ვერაფრით შეძლო "ოლდ ტრაფორდის" გახარება. არადა ამ პერიოდში "იუნაიტედს" არაერთი მსოფლიო დონის ვარკვლავი დაუკავშირეს, მათ შორის იყვნენ: გარეტ ბეილი, კრიშტიანო რონალდო, სესკ ფაბრეგასი, ანდერ ერერა, სამი ხედირა, დანიელე დე როსი, ლეიტონ ბეინსი და ფაბიო კოენტრაო.

წლის საუკეთესო ფეხბურთელი

ამ ტიტულისთვის მხოლოდ ორად ორი კანდიდატი შეგვიძლია დავასახელოთ - რობინ ვან პერსი და მაიკლ კერიკი.

ვან პერსის გოლებმა "იუნაიტედს" დაუბრუნა "პრემიერ ლიგის" ტიტული და ის გუნდში შეუცვლელ ფეხბურთელად იქცა, ხოლო კერიკის სტაბილურობამ და ეფექტურობამ ნახევარდაცვაში ამ ყველაფერს საძირკველი ჩაუყარა და სწორედ კერიკის ტრავმა არის დიდ წილად იმის მიზეზი, რომ "იუნაიტედმა" ბოლო პერიოდში ძალიან ცუდი შედგები დააფიქსირა.

უეინ რუნისთვის წლის პირველი ნაწილი არც ისე წარმატებული აღმოჩნდა, ის უკმაყოფილო იყო თავისი მდგომარეობით და ჯერ კიდევ ბევრი კითხვის ნიშანი ჰქონდა თავის მომავალთან დაკავშირებით. საბოლოოდ ის დარჩა გუნდში და ამ სეზონში საოცარ ფორმაშია. მან უკვე მოახერხა 10 გოლის გატანა და 8 ასისტის გაკეთება "პრემიერ ლიგაში". თუმცა მის მიერ გატანილი უმნიშვნელოვანესი გოლების გამო, წლის საუკეთესო ფეხბურთელად მაინც რობინ ვან პერსი უნდა დასახელდეს.

ახალი წლის გამოწვევები

"იუნაიტედის" მთავარი მიზანი იქნება უეინ რუნის შენარჩუნება, რომელსაც კონტრაქტი 18 თვეში უმთავრდება. ასევე გუნდს ჭირდება ორი ნახევარმცველი, ერთი ჩამშლელი და ერთი გამთამაშებელი. გუნდს სავარაუდოდ ტოვებს პატრის ევრა, რომელიც უკვე ვეღარ არის ძველებურ ფორმაში და ბევრ შეცდომასაც უშვებს, ჯერ-ჯერობით კი მისი ღირსეული შემცვლელი არ ჩანს გუნდში.

ნაკლებად სავარაუდოა, რომ "იუნაიტედი" გუნდის გაძლიერებას ამ ზამთარში მოახერხებს, რადგან ამ პერიოდში ძირითადად გუნდები არ უშვებენ თავიანთ ძლიერ ფეხბურთელებს.

ასევე ძალიან მნიშვნელოვანი იქნება სტაბილურად თამაში, რაც გუნდს ძალიან აკლია. ამ სეზონში ისინი უკვე ხუთჯერ დამარცხდნენ, რაც გასული სეზონის მაჩვენებლის ტოლია და ეს დიდი ხელის შემშლელი ფაქტორია ტიტულის შენარჩუნებისთვის.



საბოლოოდ კი 2013 წლის ყველაზე მნიშვნელვან მოვლენად უნდა დავასახელოთ სერ ალექს ფერგიუსონის პენსიაზე გასვლა. ადამიანის, რომელმაც უდიდესი კვალი დატოვა ფეხბურთის ისტორიაში და მუდამ დარჩება "იუნაიტედის" ფანების და ფეხბურთის მოყვარულთა გულებში, როგორც ყველა დროის საუკეთესო მწვრთნელი, რომელმაც შეუძლებელი შეძლო.