დევიდ მოიესი კმაყოფილია "ვესტ ჰემის" დამარცხებით და დარწმუნებულია, რომ "მანჩესტერ იუნაიტედი" უკვე ახერხებს სასურველ ფორმაში შესვლას.
"წითლები" მეორე ტაიმის დასასრულამდე 3 გოლიანი სხვაობით ლიდერობდნენ, თავი გამოიჩინეს დენი უელბეკმა, ადნან იანუზაიმ და ეშლი იანგმა. თუმცა ჩარლტონ კოულმა მაინც მოახერხა "ოლდ ტრაფორდის" დამწუხრება. საბოლოოდ მატჩი ანგარიშით 3-1 დამთავრდა. ასე რომ, "იუნაიტედი" კარგი განწყობით ხვდება "ჰულს" და "ნორვიჩს".
"ჩვენ რამდენიმე ძალიან კარგი გამარჯვება მოვიპოვეთ ამ სეზონში და დღევანდელი მატჩი ერთ-ერთი მათგანი იყო, ამიტომ ძალიან კმაყოფილი ვარ." - განაცხადა ბოსმა.
"მე ძალიან კმაყოფილი ვარ ფეხბურთელებით, მათ დაიმსახურეს ეს გამარჯვება. ჩვენ შეგვეძლო ოთხი ან ხუთი გაგვეტანა, თუმცა საკმარისი მომენტები ვერ შევქმენით. ასევე გავიხსენოთ ჩიჩარიტოს გოლი, რომელიც უსამართლოდ არ ჩათვალეს,"
"ჩვენი თამაში უმჯობესდება, უკეთესები ხდებიან ფეხბურთელებიც. მე ვხედავ, რომ ისინი ძალიან თავდაჯერებულები არიან როდესაც ბურთს იღებენ. პირველი გოლის დროს შესანიშნავად იმოქმედეს დენი უელბეკმა და უეინ რუნიმ. ძალიან გამიხარდა, რომ დენიმ ისევ მოახერხა გოლის გატანა, თუმცა სამწუხაროდ მან მატჩი ტრავმის გამო ვერ დაასრულა. მას ემატება თავდაჯერებულობა, ის ახერხებს მეტი გოლის გატანას და ხვდება, რომ მას შეუძლია ამის კეთება."
კოულის გოლს არანირი მნიშვნელობა არ ჰქონია მატჩის ბედზე, თუმცა მაინც სამწუხარო იყო დე ჰეას მშრალი სერიის დასრულება.
"ძალიან სამწუხარო იყო გოლის გაშვება, ჩვენ ბოლო სამ თამაშში მოვახერხეთ კარის მშრალად შენახვა და გვსურდა ეს სერია გაგვეგრძელებინა." დაამატა მოიესმა. "ჩვენ საკმარისად კარგად ვერ დავიცავით კარი, იმ მომენტში არ უნდა დაგვეტოვებინა კოული ასე თავისუფლად, თუმცა საერთო ჯამში ძალიან კმაყოფილი ვარ."
"მე ვფიქრობ ჩვენი გამარჯვება კითხვის ნიშნის ქვეშ მატჩის არცერთ პერიოდში არ ყოფილა. ყველანაირად ვეცდებით იგივე გავკეთოთ შემდეგ თამაშში. სეზონის დასრულებამდე დიდი დრო დარჩა, ამიტომ დაველოდებით მოვლენების განვითარებას."