გუშინ ღამით ინგლისის ლიგის თასის ნახევარფინალური ეტაპის კენჭისყრა გაიმართა, სადაც "იუნაიტედი" "სანდერლენდს" დაუწყვილდა, "სიტი" კი "ვესთ ჰემს". მომდევნო ეტაპი ორმატჩიან დაპირისპირებას გულისხმობს. პირველად "იუნაიტედი" მეტოქის მოედანს 6 იანვარს ესტუმრება, 20-ში კი სახლში მიიღებს. პირველ მატჩში "სიტი" მასპინძელი გუნდია. მანჩესტერულმა კლუბებმა ნახევარფინალამდე დამაჯერებლად გაიმარჯვეს. "იუნაიტედმა" "სტოკს" სტუმრად 0-2 მოუგო, იანგისა და ევრას გოლებით, "სიტიმ" კი "ლეიცესტერი" ანგარიშით 1-3 დაამარცხა, კოლაროვის და ჯეკოს დუბლის წყალობით.
"ნახევარფინალში "სანდერლენდთან" რთული მატჩი გველის. მათ სიძლიერეს "ჩელსისთან" ჩატარებული მატჩიც ადასტურებს. შეხვედრამდე ბევრი რამ შეიძლება მოხდეს, ახლა უბრალოდ ბედნიერი ვარ მომდევნო ეტაპზე გასვლით." - განაცხადა მოიესმა.