დევიდ მოიესი დარწმუნებულია, რომ უეინ რუნი შეძლებს სახელის დამკვირდრებას "მანჩესტერ იუნაიტედის" ისტორიაში და მოახერხებს კლუბის საუკეთესო ბომბარდირის, ბობი ჩარლტონის რეკორდის მოხსნას.
რუნი ამჟამად მეოთხე ადგილს იკავებს კლუბის საუკეთესო ბომბარდირთა შორის და ის მხოლოდ 42 გოლით ჩამორჩება ჩარლტონს, რომელსაც წითელი მაისურით 249 გოლი აქვს გატანილი. მენეჯერს ეჭვი არ ეპარება იმაში, რომ რუნი საუკეთესო ბომბარდირების ჩამონათვალს სათავეში ჩაუდგება.
"რუნის წინ ძალიან მნიშვნელოვანი თამაშები ელის და მას დიდი მიზნები აქვს, მას შეუძლია სერ ბობის რეკორდის მოხსნა." - განაცხადა მოიესმა პრესკონფერენციაზე.
მოიესს ასევე სჯერა, რომ რუნის ფიზიკური შესაძლებლობა მას საშუალებას მისცემს კიდევ უამრავი წელი ითამაშოს და ამ მაჩვენებლით დაეწიოს რაიან გიგზის მაჩვენებელს, რომელიც ასევე საუკეთესოა კლუბის ისტორიაში. როგორც მოგეხსენებათ, რუნი მალე მე-500 მატჩს ითამაშებს კარიერაში და მას გიგზის რეკორდამდე ჯერ კიდევ ბევრი უკლია (955 მატჩი). თუმცა, როცა მოიესს ჰკითხეს შეძლებდა თუ არა ინგლისელი თავდამსხმელი ლეგენდარული უელსელის რეკორდის მოხსნას, მან უპასუხა:
"ჩემი აზრით მას შეუძლია. ასაკის მატებასთან ერთად ის შეძლებს ახალი სტილის ათვისებას. თუ ის დაკარგავს სისწრაფეს, მას უფრო სიღრმიდან თამაშის შესაძლებლობა ექნება."
"ამ კლუბს ჰყავს უამრავი ლეგენდა და უეინს შეუძლია გახდეს ღირსეული წევრი მათ შორის. ის უკვე არის, თუმცა მას შეუძლია გახდეს საუკეთესო საუკეთესოთა შორის. თუ ის კარგად თამაშს გააგრძლეებს, დარწმუნებული ვარ ამას მოახერხებს."
"მე მჯერა, რომ მას აქვს ამის გაკეთების უნარი, ის ძალიან კარგი ფეხბურთელია და თავისუფლად შეძლებს დიდი დროით თამაშს. მან უკვე მოახერხა ბევრი მატჩის ჩატარება, თუმცა ის ამაზე არ გაჩერდება. მეორე საკითხია მიუახლოვდება თუ არა ის გიგზის მაჩვენებელს, რადგან რაიანის შედეგი უბრალოდ არაამქვეყნიურია."