ლევერკუზენის "ბაიერთან" ოთხშაბათს გამარჯვების შემთხვევაში "მანჩესტერ იუნაიტედი" 1/8 ფინალის საგზურს მოიპოვებს.

მოცემულ მომენტში დევიდ მოიესის გუნდი ლიდერობს A ჯგუფში, "წითელ ეშმაკებს" 1 ქულით ჩამორჩებიან გერმანელები, ხოლო 3 ქულით უკრაინელები.

ეჭვს ვერ შევიტანთ იმაში, რომ სამი ჰიუპიას გუნდი ამ შეხვედაში მოტივირებული იქნება, რადგან ეს გამარჯვება გერმანელებს არა მარტო შემდგომი ეტაპის საგზურს მოუტანს, არამედ ჯგუფში პირველ ადგილზე გადაიყვანს.

სექტემბერში ამ ორი გუნდის დაპირისპირებაში "იუნაიტედმა" 4–2 გაიმარჯვა, უეინ რუნიმ 2 გოლი გაიტანა და კლუბის მაისურით მე–200 გატანილი გოლი აღნიშნა.

მიუხედავად იმისა, რომ "წითლებმა" "კარდიფთან" კვირის მატჩში ფრედ 2–2 ითამაშეს, მათ შეუძლიათ დაიკვეხნონ იმით, რომ პრემიერლიგის ბოლო 6 მატჩში 14 ქულის მოგროვება მოახერხეს. ჩემპიონთა ლიგაზე "წითელ ეშმაკებს" "ბაიერთან" არ წაუგიათ 2002 წლის შემდეგ.

აღნიშნულ შეხვედრაში "ბაიერს" არ დაეხმარება თავდამსხმელი სიდნეი სამა, რომელსაც ბარძაყის კუნთის ტრავმა აქვს. სამი ჰიუპიას გუნდს შესაძლოა კიდევ ვერ დაეხმაროს მცველი სებასტიან ბენიში. რობერტო ჰილბერტი ტრავმირებულია.

"მანჩესტერ იუნაიტედი" გერმანიაში ტრავმირებული ნემანია ვიდიჩისა და რობინ ვან პერსის გარეშე გაემგზავრა. მაიკლ კერიკი ასევე ლაზარეთშია. სამაგიეროდ გუნდს დაუბრუნდნენ რაფაელი და ფილ ჯონსი. მარუან ფელაინი წითელი ბარათის მიღების გამო 1 მატჩიან დისკვალიფიკაციას მოიხდის.

სიახლის წყარო