ინგლისისა და ჩილეს ეროვნული ნაკრებების მიერ გამართულ ამხანაგურ მატჩში ფილ ჯონსმა დაზიანება მიიღო საზარდულის არეში. 21 წლის მცველი, რომელიც დაცვის ცენტრში შეწყვილებული იყო გარი კეჰილთან, 57 წუთზე იძულებული გახდა მოედანი დაეტოვებინა. მის ნაცვლად მოედანზე გამოვიდა ასევე "წითელი ეშმაკუნების" ახალგაზრდა მცველი - კრის სმოლინგი. ფილს გამოკვლევა ჩაუტარდა და დაბრუნდა მანჩესტერში, რათა მიიღოს შესაბამისი სამედიცინო დახმარება დაზიანებულ არეში.

ინგლისის ფეხბურთის ასოციაციამ კი მორიგი განცხადება გააკეთა, რომელიც ასე ჟღერს: "ფილ ჯონსი, ტრავმის გამო ვერ მიიღებს 19 ნოემბერს გასამართ მატჩში მონაწილეობას, სადაც ინგლისისა და გერმანიის ნაკრებები დაუპირისპირდებიან ერთმანეთს. "იუნაიტედის" მცველმა ჩილეს ნაკრებთან შეხვედრაში მიიღო დაზიანება და იძულებული გახდა დაბრუნებულიყო მანჩესტერში სამედიცინო დახმარების მისაღებად."

ინგლისის ნაკრების დაცვის ცენტრში, გარი კეჰილის მეწყვილე დიდი ალბათობით ფილ იაგიელკა იქნება. მთავარი მწვრთნელი კი, როი ჰოჯსონი იმედოვნებს, რომ სტივენ ჯერარდი, დანიელ სტარიჯი და რიკი ლამბერტი სრულ მზად ყოფნაში იქნებიან გერმანიის ნაკრებთან გასამართ მატჩში. ასევე მოსალოდნელია ჯო ჰარტის, ეშლი კოულის და ანდროს თაუნსენდის სასტარტო თერთმეტეულში ხილვა.

შეგახსენებთ, რომ ინგლისისა და გერმანიის ნაკრების ამხანაგური შეხვედრა 19 ნოემბერს გაიმართება.

წყარო: SkySPORTS