ფილ ჯონსი დარწმუნებულია, რომ მოხვდება "მანჩესტერ იუნაიტედის" ძირითად შემადგენლობაში ცენტრალური მცველის პოზიციაზე და გაამართლებს იმ იმედებს, რომელიც ერთ დროს სერ ალექსმა მასზე დაამყარა. ჯონსი 2011 წელს "ბლექბერნიდან" "მანჩესტერ იუნაიტედში" გადავიდა, თუმცა ჯერ კიდევ ვერ მოახერხა ძირითადი გუნდის უცვლელი წევრი გამხდარიყო.

კვირას "არსენალთან" მატჩში "ოლდ ტრაფორდზე" ჯონსმა შესანიშნავად ითამაშა ცენტრალური ნახევარმცველი პოზიციაზე, სადაც მთელი ტაიმის განმავლობაში ითამაშა, ხოლო მეორე ტაიმში ნემანია ვიდიჩის ტრამვის გამო იძულებული იყო უკან დაწეულიყო. ჯონსს კი კიდევ ბევრი აქვს სამუშაო, იმისათვის რომ სერ ალექსის წინასწარმეტყველება აღასრულოს, რომელმაც წინა სეზონის დასასრულს განაცხადა, რომ ფილს შეუძლია "იუნაიტედში" დიდი ფეხბურთელი გახდეს.

"ეს იყო ძალიან მოულოდნელი და სასიამოვნო სიტყვები, განსაკუთრებით თუ გავიხსენებთ ამ კლუბის ისტორიაში მოღვაწე ფეხბურთელებს და მათ დამსახურებებს." - გამოტყდა ჯონსი The Sun-თან ინტერვიუში. - "ამ სიტყვებს არასდროს დავივიწყებ. არ დავმალავ და ვიტყვი, რომ ძალიან მინდა ეს სიტყვები გამართლდეს, თუმცა თუ მე იმის ნახევარს მაინც მივაღწევ, რაც "იუნაიტედის" ლეგენდებმა შეძლეს, კარიერის დასრულების შემდეგ მშვიდი გულით ვიტყვი, რომ სრულიად კმაყოფილი ვარ."

"მე კმაყოფილი ვარ ჩემი ფორმით" - გააგრძელა ჯონსმა. "ასევე ბედნიერი ვარ, რომ მაქვს შესაძლებლობა ვითამაშო დაცვის ცენტრში. ყოველთვის სასიამოვნოა, როცა თამაშობ იქ, სადაც თავს კომფორტულად გრძნობ. მე 'ნორვიჩის' წინააღმდეგ ნახევარდაცვაში ვითამაშე, თუმცა შესაძლებლობა მქონდა მეთამაშა ცენტრალური მცველის როლი, სწორედ ამ პოზიციაზე მსურს თამაში. ჩემი მოსვლის დღიდან კლუბს გადაწყვეტილი ჰქონდა მე დაცვის ცენტრში დავეყენებინე და იმედი მაქვს, ამ სეზონში სწორედ ამ პოზიციაზე მომიწევს თამაში. თუ მე მწვრთნელი მენდობა, მე გავაკეთებ ყველაფერს იმისათვის, რომ წარმატებულად ვიასპარეზო."

ჯონსი ასევე რეგულარულად იღებს მოწვევას ინგლისის ნაკრებიდან და იმედოვნებს, რომ ის შედის როი ჰოჯსონის გეგმებში ბრაზილიის 2014 წლის მსოფლიო ჩემპიონატისთვის.

"რაც შეეხება ინგლისის ნაკრებს" - დაამატა ჯონსმა. "აქ ძალიან დიდი კონკურენციაა. გუნდში ძალიან ბევრი კარგი მცველი და ნახევარმცველია. ადვილი არ იქნება ნაკრებში მოხვედრა, თუმცა ვიმედოვნებ, რომ მოვახერხებ ბრაზილიის საგზურის მოპოვებას. ინგლისის ნაკრებში ბევრი 'იუნაიტედის' ფეხბურთელია, დაახლოებით ექვსი-შვიდი და გუნდისთვის სასარგებლო იქნება თუ ჩვენ ერთად ვითამაშებთ."