ლევერკუზენის "ბაიერს" პირველივე ტურში ურთულესი მატჩი ელის: სამი ჰიიპიას გუნდი ინგლისის მოქმედ ჩემპიონ "მანჩესტერ იუნაიტედს" სტუმრობს და თითქოს ეს საკმარისად რთული ამოცანა არ იყო, ლევერკუზენელთა მდგომარეობას ის ფაქტიც ამძიმებს, რომ გონსალო კასტრო და ლარს ბენდერი ვერ ითამაშებენ (ორივე ტრავმირებულია). "ბაიერის" ფინელი დამრიგებელი ამ დანაკლისს კატასტროფად არ მიიჩნევს - შესაძლოა იმიტომაც, რომ "ვოლფსბურგთან" (3:1) სიმონ როლფესმა შესანიშნავად ითამაშა. ამ უკანასკნელის თქმით, "იუნაიტედისგან" საჩუქრებს არ უნდა ველოდოთ, ეს გუნდი ზედმეტად გამოცდილია იმისათვის, რომ რამე გვაჩუქოსო. "იუნაიტედის" გამოცდილებაზე საუბარი შორს წაგვიყვანს - სამაგიეროდ, ევროსარბიელზე გამოუცდელია "წითელი ეშმაკუნების" ახალი თავკაცი დევიდ მოიესი...

თუკი ლევერკუზენელებს "ოლდ ტრაფორდზე" ვინმეს იმედი უნდა ჰქონდეს, ეს პირველ რიგში გოლეადორ შტეფან კისლინგზე ითქმის. გერმანულ კლუბს, შესაძლოა, მწვრთნელი ჰიიპიას გამოცდილებაც გამოადგეს, - ეს უკანასკნელი ხომ "ლივერპულში" ასპარეზობდა და "იუნაიტედის" წინააღმდეგ არაერთხელ უთამაშია. "მანჩესტერელთაგან" ყველაზე სახიფათო ამ ეტაპზე რობინ ვან პერსია, რომელსაც პრემიერლიგაში სამი გოლი აქვს გატანილი.

ჯგუფის მეორე დუელი კი სან სებასტიანში, "რეალ სოსიედადსა" და იმ დონეცკის "შახტარს" შორის შედგება, რომელმაც ზაფხულში ჰენრიხ მხითარიანისა (დორტმუნდშია) და ფერნანდინიოს (სიტი) სახით ორი ლიდერი დაკარგა. უკრაინულმა გრანდმა მათ სანაცვლოდ ჯამში 62.5 მილიონი ევრო მიიღო და ამ თანხის დიდი ნაწილი ბრაზილიელებში, ბერნარდსა და ფრედში დააბანდა. ესპანური კლუბი კი ჩემპიონთა ლიგაში 10-წლიანი პაუზის შემდეგ დაბრუნდა. ათი წლის წინათ "სოსიედადმა" მერვედფინალამდე გააღწია, სადაც "ლიონთან" დამარცხდა. ცნობისთვის გაგახსენებთ, რომ ახლა ბასკებმა პლეი ოფში სწორედ "ლიონს" დაჯაბნეს!.