დავიდ პეტრუჩიმ, რომელიც ახლა "ანტვერპენში" თამაშობს არენდის სახით, განაცხადა, რომ უარს არ იტყვის "იუნაიტედის" პირველ გუნდში თამაშისთვის.
"მე ვესაუბრე ჯონი ევანსს, რომელმაც ბევრი კარგი რამ მითხრა "ანტვერპენის" შესახებ, ისიც ხომ ამ კლუბის ღირსებას იცავდა ერთ დროს, - აცხადებს პეტრუჩი ManUtd.com-თან ინტერვიუში. - ვფიქრობ, ეს ერთ-ერთი ძირითადი მიზეზი იყო იმისა, რომ ამ კლუბში წამოვედი. ამასთანავე "ანტვერპენს" ჯიმი ფლოიდ ჰასელბაინკი წვრთნის, რომელიც შესანიშნავი ფეხბურთელი გახლდათ. ჩემთვის ეს დამატებითი მოტივაციაა და სწორედ ამიტომ გადავწყვიტე არენდით წასვლა. ახლა მე ისეთ ასაკში ვარ, რომ ძალიან მჭირდება სათამაშო დრო. რეზერვებში თამაში ძალიან კარგია და იქ ყოველ წელს ერთ ტიტულს მაინც ვიგებდი. ახლა კი ერთი ნაბიჯით წინ წასვლა გახდა საჭირო. რეზერვებში იმდენს ვერ მივაღწევდი, რასაც უკვე არენდის დროს მივაღწიე."
"ვფიქრობ, დევიდ მოიესს უჭირს,რადგან ის სულ ახლახანს გამოვიდა ჩვენთან და მხოლოდ პირველ გუნდზე აკეთებს აქცენტს. ყველაფერი ეს გასაგებია, მაგრამ მე ჩემს თავზე უნდა ვიფიქრო და შევძლო უკეთესად თამაში. იმედია, მწვრთნელი ამას შეამჩნევს და უკან დავბრუნდები."
პეტრუჩის ცოტა არ გაუმართლა, როდესაც სეზონის დასასრულს "პიტერბრო იუნაიტედში" შესანიშნავი თამაშის შემდეგ ტრავმა მიიღო. იტალიელ ახალგაზრდას ძალიან ბევრი უიღბლობა დაემართა, მაგრამ მან დაამტკიცა, რომ ის ერთ-ერთი საუკეთესო ფეხბურთელია უორენ ჯოისის გუნდში.
"მე თავს კარგად ვგრძნობდი, - გაზი გაუსვა დავიდმა. - წარსულში ცუდი ტრავმები მქონდა, მაგრამ რაც არ გკლავს, გაძლიერებს. ეს ჩემი აზრია. ამის შემდეგ კი, როდესაც ტრავმას ვიღებ, ვცდილობ უკეთესად ვითამაშო და უფრო მეტი დავამტკიცო. იმედი მაქვს, რომ "იუნაიტედში" დავბრუნდები და პირველ გუნდშიც ვითამაშებ."