დიახ, ჩიჩარიტო მექსიკაში ბარდის მარცვალს ნიშნავს, ეს ზედმეტსახელი მან მწვანე თვალების გამო მიიღო.

მისი ბაბუაც ფეხბურთელი იყო და მსოფლიო ჩემპიონატში მიიღო მონაწილეობა, არც მამამისმა დააკლო, თუმცა ყველას ჩიჩარიტომ აჯობა და ვუვუზელაგატენილ სამხრეთ აფრიკაში ორი გოლიც გაიტანა.

სერ ალექს ფერგიუსონი: "ამ ბიჭზე პირველი სიგნალი 2009 წლის ოქტომბერში მოგვივიდა და უკვე დეკემბერში ჩვენი აგენტი გვადალახარაში იყო. შთამბეჭდავი რაპორტი ჩამოიტანა. მისი ასაკის გამო მოცდა გადავწყვიტეთ, მაგრამ მერე ნაკრებში გამოჩნდა და მსოფლიოს განაცხადშიც მოხვდა, რაც დიდ ყურადღებას მიიპყრობდა. ამიტომ ჩვენი მთავარი სკაუტი ჯიმ ლოულური სამი კვირით მექსიკაში გავუშვით, იქიდან კი ფანტასტიკური ამბავი ჩამოვიდა, აპრილში წინასწარი თანხმობა მივიღეთ, ივლისში კონტრაქტი გავაფორმეთ და ეს ძალიან წარმატებული ტრანსფერი გამოდგა".

ჯერ-ჯერობით რაც ჩანს, ამ მოფარფატე ფორვარდის მთავარი იარაღი საგოლე ინტუიციაა - ის რასაც უმრავლესობა ასაკთან და გამოცდილებასთან ერთად გამოიმუშავებს, ჩიჩარიტოს უკვე აქვს და ეს დიდი ფორაა. მეორე ფორა ისაა, რომ ორფეხაა. ეს კი ისეთი ამბავია, ვერც ასაკი შველის და ვერც გამოცდილება. გარდა ამისა ძალაინ სწრაფია, ბურთი გემრიელად იცის სივრცეებს კარგად ხედავს და მიუხედავად მოკრძალებული გაბარიტებისა, თავითაც კარგად უბრახუნებს.

მორიდებული წესიერი კაცია. არ უყვარს ხმაური, ლუდი და ბარებში ძრომიალი. ჯერ კიდევ სამშობლოში, უნივერსიტეტში სწავლობდა ბიზნეს ადმინისტრირების და ინგლისურიც ესპანურივით იცის.

ერთი ისაა, რომ წელს ბევრი სათამაშო დრო არ მისცემია. არა და რამდენჯერ შემოვიდა, იმდენჯერ აშკარად დაეხმარა გუნდს, მაგრამ რობინ ვან პერსის გამოჩენის შენდეგ, ჩიჩარიტო ჩრდილში წამოწვა. არა და გასაკვირია, ერთი პერიოდი ჩიჩამ სკამზე თვით 10 ნომერი უეინ რუნი დასვა.

მთხოვნელებსაც არ უჩივის, აგერ რამდენ კლუბს უნდა მისი შეძენა, თან სულ გრანდები. ვის არ სურს საკუთარ გუნდში ახალგაზრდა, მაგრამ გამტანი ფეხბურთელი?

ეს ზაფხული ჩიჩასთვის ისეთივე ცხელი იქნება, როგორც ახლა ცხელა თბილისში, არა და ბევრჯერ უთქვამს "მანჩესტერის" მადლობელი ვარ და მინდა თამაშით დავაფასოო.