მადრიდის "რეალის" პრეზიდენტის ფლორენტინო პერესის თქმით, რონალდო მზადაა კლუბთან ხელშეკრულება გაახანგრძლივოს. The Sun-მა გუშინ ექსკლუზიური სტატია გამოაქვეყნა, სადაც ეწერა, რომ "იუნაიტედი" რონალდოს დასაბრუნებლად 65 მილიონ ფუნტს იხდიდა და მისი გადაბირება 8 აგვისტომდე სურდა. მაგრამ პერესმა გუშინ ღამით კიდევ ერთხელ განაცხადა, რომ პორტუგალიელი მზადაა კონტრაქტის პირობები განიხილოს. "ჩემი, კრიშტიანოს და "რეალის" ფანების მიზანი არის ის, რომ მან ჩვენთან კიდევ დიდი ხნით ითამაშოს. და როცა ხალხს ერთი მიზანი აქვთ, მსგავსი პრობლემა ყოველთვის გვარდება. არაფერია იმაზე უკეთესი, გყავდეს მსოფლიოში საუკეთესო ფეხბურთელი შენს კლუბში. ფულზე ჯერ არ გვილაპარაკია. რონალდო დასასვენებლადაა და ეს საკითხი მოიცდის იქამდე, სანამ ის არ დაბრუნდება." - განაცხადა ფლორენტინო პერესმა.