ბალოტელიმ შესაძლოა "სიტი" დატოვოს, მაგრამ ქალაქ მანჩესტერში დამცინავების ნაკლებობა ჯერ-ჯერობით არ არის. ვიღაცამ, და ალბათ ძნელი გამოსაცნობი არცაა "იუნაიტედის" ფანმა, "მანჩესტერ სიტის" სავარჯიშო მოედნის შესასვლელზე 20-იანი მიახატა, რომ "ცისფერებმა" არასოდეს დაივიწყონ და სამუშაოს დაწყებისას ყოველთვის გაიხსენონ რამდენჯერ აქვთ მეზობლებს ინგლისის ყველაზე პრესტიჟული ლიგის თასი აღმართული. "ასტონ ვილას" დამარცხების შემდეგ, "იუნაიტედმა" პრემიერ ლიგის ჩემპიონობა უკვე მეოცედ გაინაღდა. ამ მაჩვენებელის მიხედვით მეორე ადგილს "ლივერპული" 18 ტიტულით იკავებს, "სიტის" მხოლოდ 3-ჯერ აქვს ეს ჩემპიონატი მოგებული.
"მანჩესტერ სიტიმ" დღეს გასვლით მატჩში "სუონსთან" ფრედ ითამაშა და "იუნაიტედს" 13 ქულით ჩამორჩა, ხვალ თუ "წითლები" "ჩელსის" დაამარცხებენ, ქულათა სხვაობა 16-მდე გაიზრდება. "ცისფერების" ერთადერთი იმედი ამ სეზონში ინგლისის თასია - ისინი ასოციაციის თასის ფინალში "უიგანს" შეხვდებიან.