ინგლისის ნაკრების მთავარი მწვრთნელის თანაშემწემ გარი ნევილმა პარასკევს „უემბლის კლუბის“ წევრებთან შეხვედრა გამართა, სადაც მან ინგლისური ფეხბურთის განვითარების გზებზე ისაუბრა. ნევილმა „უემბლის“ დარბაზში შეკრებილებს აღნიშნული მიზნის მისაღწევად ისეთი კლუბების არსებობის აუცილებლობა დაუსახელა, როგორებიც არიან „მანჩესტერ იუნაიტედი“ და „არსენალი“. კიდევ ერთ მაგალითად მან გერმანული „დორტმუნდი“ მოიყვანა. “ოთხშაბათს საღამოს „დორტმუნდის“ მატჩს ვუყურეთ, მათ მმართველობის პოლიტიკა 6 წლის წინ შეცვალეს და თქვეს, რომ ტრანსფერებზე დიდი თანხების დახარჯვის ნაცვლად ფეხბურთელებს თავად განავითარებდნენ. ოთხშაბათის შეხვედრაში ამ გადაწყვეტილების შედეგი დავინახეთ. ეს გუნდი საშუალოდ 29 მილიონ ფუნტს ხარჯავს, ინგლისურ ჩემპიონშიპში კი არიან კლუბები, რომლებიც ასევე 29 მილიონს ხარჯავენ. ეს არის გზა, რომელიც მე სწორად მიმაჩნია.“ ნევილის ყოფილმა კლუბმა „მანჩესტერ იუნაიტედმა“ ორშაბათს პრემიერ ლიგის ჩემპიონობა გაინაღდა. ისინი კვირის მატჩში „არსენალთან“ გასვლით შეხვედრას გამართავენ. გარიმ ინგლისური ფეხბურთის წარმატების გასაღებად სწორედ ეს ორი გუნდი დაასახელა. “ახლა რომ მე რომელიმე კლუბის გაწვრთნა მინდოდეს „არსენალს“ ავირჩევდი. მათ სწორი ფილოსოფია აქვთ არჩეული, ისინი იძენენ ახალგაზრდა ფეხბურთელებს და ზრდიან მათ. გუნდს სჭირდება რამდენიმე ფეხბურთელის ჯგუფი, რომლებისაც მათ ყველაზე მეტად სჯერათ, რომლებიც ამ კლუბში დიდხანს, მინიმუმ 10 წელი დარჩებიან.“ “მანჩესტერ იუნაიტედმა“ ამ კვირაში მოიგო ჩემპიონატი ქლევერლით, კერიკით, ჯონსით, უელბეკით, სმოლინგით, რუნით, გიგზით, ევანსით - ფეხბურთელებით, რომლებიც ამ კლუბში წლებია თამაშობენ. მათ ამდენს მიაღწიეს „მანჩესტერ იუნაიტედის“ არჩეული გზის საშუალებით. ისინი არსად არ მიდიან, ინგლისურ ფეხბურთსაც სწორედ ეს სჭირდება. შეხედეთ გერმანიას, „ბაიერნს“ ექვსი ახალგაზრდული სისტემით აღზრდილი ფეხბურთელი ჰყავს, „ბარსელონას“ შვიდი, ანალოგიურს აკეთებდა „მილანი“ 90-იან წლებში. ძლიერი „ბარსელონა“ ნიშნავს ძლიერ ესპანეთს, ძლიერი „ბაიერნი“ ნიშნავს ძლიერ გერმანიას.“ - დაასრულა ნევილმა.