მარკუს რაშფორდი "ბარსელონასთან" რამოდენიმე წლიანი კონტრაქტის გაფორმებასთან ძალიან ახლოსაა.
ინგლისელი თავდამსხმელი შესაძლოა უახლოეს თვეებში ოფიციალურად დაემშვიდობოს თავის ყოფილ კლუბს და კარიერა ესპანეთში რამოდენიმე წლით გააგრძელოს.

არსებული ინფორმაციით, ფეხბურთელი ძალიან ახლოს არის იმასთან, რომ "კატალონიელებთან" იჯარის შემდეგ სრულფასოვანი, მუდმივი რამოდენიმე წელზე გათვლილი კონტრაქტი გააფორმოს.

შეგახსენებთ, რომ რეშფორდმა მიმდინარე სეზონში ბარსელონაში იჯარის წესით ითამაშა და გუნდისთვის მნიშვნელოვანი ფიგურა გახდა. მისი სისწრაფე, ფლანგიდან ინდივიდუალური გარღვევები და გოლის ალღო ესპანურ პრესაში არაერთხელ დადებითად შეფასდა.

კატალონიური კლუბის სამწვრთნელო შტაბი, მათ შორის მთავარი მწვრთნელი ჰანსი ფლიკი, ფეხბურთელის პროფესიონალიზმსა და მოედანზე გავლენას განსაკუთრებულად უსვამს ხაზს. ტრანსფერის სავარაუდო ღირებულებად დაახლოებით 30 მილიონი ევრო სახელდება, რაც "ბარსელონამ" ფინანსური სტრატეგიის გათვალისწინებით ეტაპობრივად უნდა გადაიხადოს.

გავრცელებული ცნობებით, თავად რაშფორდიც დათანხმდა ხელფასის კორექტირებას, რათა ტრანსფერი კლუბის ფინანსურ ჩარჩოებში მოქცეულიყო. ეს ნაბიჯი მიუთითებს, რომ ფეხბურთელი საკუთარ მომავალს უკვე "კამპ ნოუზე" ხედავს.

"მანჩესტერ იუნაიტედში" რაშფორდი წლების განმავლობაში ერთ-ერთი მთავარი ფიგურა იყო და აკადემიიდან წამოსული ფეხბურთელის სტატუსით განსაკუთრებული მხარდაჭერაც ჰქონდა. თუმცა ბოლო სეზონებში გუნდის შედეგიანობის ვარდნამ და ტაქტიკურმა ცვლილებებმა მისი როლი გარკვეულწილად შეამცირა.

სწორედ ამ ფონზე გადაწყდა იჯარის ვარიანტი, რომელმაც საბოლოოდ შესაძლოა მუდმივ ტრანსფერში გადაიზარდოს. თუ შეთანხმება ოფიციალურად დადასტურდება, ეს იქნება ერთ-ერთი ყველაზე მნიშვნელოვანი ნაბიჯი როგორც რაშფორდის კარიერაში, ისე "მანჩესტერ იუნაიტედის" სატრანსფერო პოლიტიკაში. ინგლისელი თავდამსხმელი ახალ ჩემპიონატში სრულფასოვანი რესტარტის შანსს მიიღებს, ხოლო "იუნაიტედი" - ფინანსურ რესურსს გუნდის გადახალისებისთვის.