ინგლისის პრემიერ ლიგის ახალმა სეზონმა სტარტი ოფიციალურად აიღო, თავისი შეხვედრა რუბენ ამორიმის "მანჩესტერ იუნაიტედმაც" ჩაატარა სადაც მინიმალური სხვაობით მარცხი განიცადა ლონდონის "არსენალის" წინააღმდეგ.

გთავაზობთ კომენტარს რომელიც მარცხის შემდეგ პორტუგალიელმა სპეციალისტმა ჟურნალისტებისთვის მიცემულ ინტერვიუში გააზიარა.

ერთადერთი გოლი შეხვედრის მე-13 წუთზე გავიდა, როდესაც "მეთოფეების" მცველმა რიკარდო კალაფიორიმ კუთხურის ჩაწოდების შემდეგ ბურთი კარის ბადეში გაახვია.

ამ ეპიზოდმა დავა გამოიწვია, რადგან შესაძლოა, "ლონდონელების" ფეხბურთელები მეკარე ალტაი ბაინდირის დაბლოკვაში ზედმეტად აქტიურები იყვნენ.

"ყველას შეუძლია უპასუხოს კითხვას, თუ რამდენად დამსახურებული იყო ჩვენი მარცხი. ვფიქრობ, წაგებას არ ვიმსახურებდით. სტანდარტული მომენტიდან უცნაური გოლი მივიღეთ.

თუმცა აღსანიშნავია რომ ჩვენ თვითონ ვერ შევძელით გაგვეტანა, რამაც საბოლოოდ გადამწყვეტი როლი ითამაშა შეხვედრაში", - ციტირებს ამორიმის სიტყვებს "United Zone".

შეგახსენებთ, რომ 24 აგვისტოს „წითელი ეშმაკები" მეორე რაუნდის მატჩში "ფულჰემს" დაუპირისპირდებიან.