ახლა უკვე ოფიციალურად "მანჩესტერ იუნაიტედი" იუწყება, რომ მათეუს კუნიას ტრანსფერი დაიხურა, ბრაზილიელი "მანჩესტერელთა" რიგებს შეუერთდა.

26 წლის თავდამსხმელმა კონტრაქტი 2030 წლის ივნისამდე გააფორმა, კიდევ ერთი წლით გახანგრძლივების შესაძლებლობით.

"ძნელია სიტყვებით გადმოვცე ჩემი გრძნობები - მე "მანჩესტერ იუნაიტედის" ფეხბურთელი გავხდი! ბავშვობიდან, როდესაც ბრაზილიაში ბებიასთან ტელევიზორში ვუყურებდი პრემიერ ლიგას, "იუნაიტედი" ჩემი საყვარელი ინგლისური გუნდი იყო და ჩემი ოცნება იყო, ერთ დღეს წითელი მაისური მომერგო.

მადლობელი ვარ ჩემი ოჯახის და ყველასი, ვინც ამ ოცნების რეალობად ქცევაში დამეხმარა.

მოუთმენლად ველი წინასასეზონო ტურნეს, თანაგუნდელებთან შეხვედრას და ახალი სეზონისთვის მზადებას. ახლა ჩემი მიზანი შრომისმოყვარეობა, გუნდის წარმატება და კლუბის მწვერვალებზე დაბრუნება იქნება", განაცხადა დასასრულს კუნიამ.

"მანჩესტერელთა" სპორტულმა დირექტორმა ჯეისონ უილკოქსმა ასევე განაცხადა: "მათეუსის მოყვანა ამ ზაფხულს ჩვენი ერთ-ერთი მთავარი მიზანი იყო და ჩვენ ძალიან გვიხარია, რომ ტრანსფერი ასე ადრე დავასრულეთ.

მან უკვე დაამტკიცა, რომ წარმატებული მოთამაშეა პრემიერ ლიგაში, გახდა ინგლისის ერთ-ერთი ყველაზე საინტერესო და პროდუქტიული თავდამსხმელი "ვულვზში" თამაშის დროს, ხოლო მანამდე ესპანეთსა და გერმანიაში.

მას აქვს ყველა ის თვისება, რასაც ვეძებთ, რათა შევქმნათ ძლიერი, დინამიური და საინტერესო გუნდი, რომელსაც შეუძლია იბრძოლოს ყველაზე პრესტიჟული ტიტულებისთვის",- აცხადებს უილკოქსი.