"მანჩესტერ იუნაიტედის" კაპიტანმა ბრუნო ფერნანდეშმა საუდის არაბეთში მისი გადაბირების მცდელობებს მკაფიო პასუხი გასცა.

ავტორიტეტული ინსაიდერის, ფაბრიციო რომანოს მიერ გავრცელებული ცნობით, პორტუგალიელმა უარი თქვა "ალ-ჰილალის" შეთავაზებაზე, მიუხედავად უკიდურესად ხელსაყრელი ფინანსური პირობებისა.

საუდის პრო ლიგის კლუბმა ფერნანდეშს კონტრაქტი შესთავაზა, რომელიც გულგრილს არავის დატოვებს. თუმცა, ნახევარმცველმა საბოლოო არჩევანი გააკეთა - მას სურს კარიერის გაგრძელება ევროპულ ფეხბურთში და არ აპირებს ინგლისური გრანდის დატოვებას ამ ზაფხულს.

2024/2025 წლების სეზონში ბრუნომ 57 მატჩი ჩაატარა, 19 გოლი გაიტანა და 20 საგოლე გადაცემა გააკეთა, რითაც გუნდის ერთ-ერთი მთავარი საკვანძო ფიგურა დარჩა.

მისი კონტრაქტი "იუნაიტედთან" 2027 წლის ზაფხულამდეა გათვლილი და მისი საბაზრო ღირებულება, Transfermarkt-ის მონაცემებით, 50 მილიონი ევროა.