"მანჩესტერ იუნაიტედში" ბოლო კვირების განმავლობაში მისასალმებელი ცვლილებები მოხდა. მათ რეალურად დაიწყეს გუნდის მოდიფიკაცია და რამდენიმე ფეხბურთელიც გაუშვეს კლუბიდან.

დონი ვან დე ბეეკი იჯარით გადავა ფრანკფურტის "აინტრახტში" გამოსყიდვის უფლებით, ჯეიდონ სანჩო დაბრუნდა დორტმუნდის "ბორუსიაში" სეზონის ბოლომდე, ხოლო ჰანიბალ მეჯბრი "სევილიას" ასევე იჯარით შეუერთდება.

ეს ცვლილებები ცხადია წინ გადადგმული ნაბიჯია სწორი მიმართულებით. წარსულში "იუნაიტედს" უჭირდა გუნდიდან ზედმეტი ფეხბურთელების გაშვება და ახლა საბოლოოდ, როგორც ჩანს, ამ კუთხით ყველაფერი იცვლება.

თუმცა ეს მხოლოდ დასაწყისია. ინგლისურ გრანდს ჯერ კიდევ ბევრი სამუშაო აქვს, გასაშვები კიდევ ბევრია. მოგეხსენებათ, რომ კლუბმა 205 მილიონი ფუნტი დახარჯა მარჯვენა ფლანგელებში მას შემდეგ, რაც სანჩო შეიძინა 2020 წელს, ამ უკანასკნელმა კი გადაწყვეტა, რომ თურმე ის მარცხენა გარემარბია.

როგორც ბოლო შეხვედრებში ვიხილეთ ალეხანდრო გარნაჩო გამოირჩა თავისი კარგი პერფორმანსით მარჯვენა ფლანგზე და, როგორც ჩანს, ის აუცილებლად შეინარჩუნებს სასტარტოში ადგილს კვირას "ტოტენჰემთან" გასამართ შეხვედრაში.

ეს ნიშნავს, რომ "იუნაიტედს" ახლა უკვე კლუბში ჰყავს სამი გამოკვეთილი მარჯვენა-ფლანგელი, ცხადია რომ არცერთ მათგანს არ სურს იყოს სარეზერვო ვარიანტი. მთავარ კანდიდატად მაინც ანტონი რჩება. ის ამ ტრიოდან ყველაზე გამოცდილია, ის ყველაზე მეტი ფული დაჯდა, ასევე ტენ ჰაგის კაცია და მენეჯერზე რეალური ზეწოლა აქვს, რომ მაქსიმალურად გამოიყენოს ყოფილი "აიაქსელი".

რა თქმა უნდა, არსებობს დამაჯერებელი არგუმენტები იმის დასამტკიცებლად, რომ მომავალში ის უნდა გაიყიდოს, რადგან ბოლოდროინდელი მისი გამოსვლები ვერანაირ კრიტიკას ვერ უძლებს და მან თამაშის ხარისხი თუ არ გამოასწორა, რაც ძნელად სავარაუდოა ნამდვილად გაშვების კანდიდატი გახდება.

ასევე ძირითადში ადგილის მოსაპოვებლად იბრძვიან ამადიც და ფაკუნდო პელისტრიც, მაგრამ არცერთი მათგანი არ გამოიყურება სრულიად მზად იმისათვის, რომ ეს ადგილი გარანტირებული ქონდეთ.

პელისტრი ახლა 22 წლისაა და არ შეიძლება ჩაითვალოს როგორც ამომავალი ვარსკვლავი, როგორიც ადრე იყო. მან წინა სეზონზე 18 მატჩი ჩაატარა ძირითადში, მათ შორის სამი მსოფლიო ჩემპიონატზე და მას უკვე რეგულარულად თამაში სჭირდება. მაშინაც კი, თუ ის იჯარით ბრწყინავს, მაინც ძნელია იმის დანახვა, რომ ის "ოლდ ტრაფორდზე" გამოვა და გაიბრწყინებს.

მსგავსი სიტუაციაშია ამადიც. ის 21 წლისაა და მას შემდეგ, რაც "სანდერლენდში" თამაშით საკმაო გამოცდილება მიიღო, ისევ სურს დაბრუნდეს უკან იჯარით და აინაზღაუროს დაკარგული დრო, რომელიც ტრამვების გამო გაუცდა.

შესაძლოა ჯერ კიდევ იყოს იმედი პელისტრისა და ამადისთვის, რომ მათ ითამაშონ სერიოზული როლი "იუნაიტედის" მომავალში, მაგრამ მკაცრი რეალობა კი ის არის, რომ ამას ორივე ვერ შეძლებს, განსაკუთრებით გარნაჩოს ბოლოდროინდელი პოზიციის ცვლილების შემდეგ.

სავარაუდოა, რომ ამჟამად პელისტრისთვის და დიალოსთვის იჯარით წასვლა ყველაზე უსაფრთხო ვარიანტი იყოს, ასევე მათი საბოლოოდ გაყიდვის ოფციაც უნდა იყოს გათვალისწინებული.