როდესაც გუნდი ვერ აჩვენებს სტაბილურ თამაშს, რაც გულისხმობს დომინანტურ პოზიციაში ყოფნას, გულშემატკივრები ხშირად ვეძებთ განტევების ვაცს, იქნება ეს მწრთვნელი, ფეხბურთელი თუ ხელმძღვანელი.

დღეს, ასეთი ვაცის როლში მოგვევლინა ერიკ ტენ ჰაგი და უკვე აშკარად იწერება არა მხოლოდ გულშემატკივრების არამედ ექსპერტების მიერ, რომ დროა ის დაემშვიდობოს "იუნაიტედს". რაც ცხელ გულზე ნათქვამს უფრო გავს ვიდრე გაანალიზებულ პოზიციას, მეც, როგორც "იუნაიტედის" რიგით გულშემატკივარს, მსგავსმა აზრზმა მაშინ გამიელვა როდესაც ტენ ჰაგმა დე ხეა, ადამიანი რომელმაც "მანჩესტერს" კარიერა შესწირა და "ქსეროქსის" ინციდენტს თუ არ ჩავთვლით გული და სული დადო მოედანზე, უბრალოდ "გაუშვა", გაცილების ან/და რამე მნიშვნელოვანი განცხადების გარეშე თითქოს არ გამართლებული ტრანსფერი ყოფილიყო.

ამ ყველაფრის მიუხედავად, პირველ რიგში საკუთარი თავის დასარწმუნებლად, რომ მომავალში წაგების გამო არ გამიჩნდეს სურვილი ტენ ჰაგი ეგრევე გაუშვან, გადავწყვიტე ერთი-ორი სიტყვა დამეწერა იმის შესახებ თუ რატომ იმსახურებს ეს ადამიანი მეტ დროს.

პირველ რიგში, გამომდინარე მისი კარიერიდან, არც თუ ისე დიდი დრო გავიდა რომ დაგვიწყებოდა მისი თანამედროვე და დინამიური თამაშის სტილი "აიაქსში". მისი გუნდები ცნობილია მაღალი პრესინგით, ბურთის ფლობაზე დაფუძნებული ფეხბურთით, რომელიც კარგად შეესაბამება "მანჩესტერ იუნაიტედის" ისტორიულ აქცენტს შემტევ ფეხბურთზე. რის გამოც ვფიქრობ, რომ ჰოლანდიელს დრო სჭირდება "ოლდ ტრაფორდზე" თავისი ფილოსოფიის და ტაქტიკის დასანერგად და რომ ნაჩქარევმა წასვლამ შეიძლება შეაფერხოს შეკრული და კონკურენტუნარიანი გუნდის შექმნის პროცესი.

ტენ ჰაგის ერთ-ერთი დამახასიათებელი ნიშანი არის მისი უნარი აღზარდოს ახალგაზრდა ნიჭი. "აიაქსის" ახალგაზრდულმა აკადემიამ მისი ხელმძღვანელობით უამრავი ნიჭიერი ფეხბურთელი გამოუშვა და "მანჩესტერ იუნაიტედის" გულშემატკივრებსაც, თავის მხრივ სურთ იხილონ კლუბში ახალგაზრდების განვითარებაზე მსგავსი აქცენტი, შეგახსენებთ ჟოზე მოურინიოს კრიტიკის ერთ-ერთ საფუძველს, რომ აკადემიას არ აძლევდა დროს და სულ ვიღაცას ყიდულობდა.

ტენ ჰაგის კარიერა გვაძლევს ვარაუდის საფუძველს, რომ ის შეიძლება იყოს სწორი ადამიანი, რომელიც "ოლდ ტრაფორდზე" მომავალი თაობის ვარსკვლავებს მისცემს შანსს და ახალგაზრდობის პოპულარიზაციის კლუბის ტრადიციას განაგრძობს.

მიუხედავად იმისა, რომ ნიდერლანდელის თავდაპირველ მოღვაწეობას "მანჩესტერ იუნაიტედში" თავისი წილი გამოწვევები ჰქონდა, ვფიქრობ ნაადრევია მისი განსჯა მხოლოდ მოკლევადიანი შედეგების საფუძველზე. თამაშის ახალ სტილზე გადასვლას და მომგებიანი მენტალიტეტის დანერგვას დრო სჭირდება, მითუმეტეს გუნდში რომელიც "წინდებივით" ცვლიდა რადიკალურად განსხვავებული სტილის მწრთვნელებს და გუნდში არ არსებობს ერთიანი სტრატეგია, რის გამოც მოუთმენლობამ შეიძლება შეაფერხოს გუნდის გრძელვადიანი წარმატება.

როგორც ზემოთ ვახსენეთ, "მანჩესტერ იუნაიტედი" ბოლო წლებში ხშირად განიცდიდა მენეჯერულ ცვლილებებს, რამაც გამოიწვია სხვადასხვა სტილის ფეხბურთელის შეძენა, რომელთაც უჭირთ ერთმანეთთან შეთამაშება. მიმაჩნია, რომ ტენ ჰაგს თუ მიეცემა შესაძლებლობა, შეუძლია უზრუნველყოს ძალიან საჭირო სტაბილურობა, რომელიც საჭიროა წარმატებული და მდგრადი გუნდის შესაქმნელად. სამწვრთნელო შტაბში უწყვეტობამ და სათამაშო სტილმა შეიძლება გააძლიეროს კლუბის იდენტურობის განცდა, რაც აკლდა სერ ალექს ფერგიუსონის შემდგომ ეპოქაში.

გარდა ამისა, მნიშვნელოვანია ვაღიაროთ ის რთული გარემოებები, რომლებსაც ერიკ ტენ ჰაგი გადააწყდა. მნიშვნელოვანი დაბრკოლებაა მუდმივი ტრავმების კრიზისი, რომელიც აწუხებს გუნდს, რაც ხელს უშლის მენეჯერს სრულად განახორციელოს სასურველი ტაქტიკა მუდმივად ხელმისაწვდომი სასტარტო XI-ით. ფეხბურთი არის სპორტი, სადაც წარმატება ხშირად დამოკიდებულია მოთამაშეებს შორის სინერგიაზე და შეკრული თამაშის გეგმის შესრულებაზე. ძირითადი მოთამაშეების ტრავმების გამო, ტენ ჰაგი იძულებული გახდა ადაპტირების და ტაქტიკურ კომპრომისებზე წასვლისკენ, რაც ზღუდავს მის უნარს წარმოაჩინოს თავისი სტრატეგია. მენეჯერის განსჯა ამ ვითარებაში უსამართლო იქნებოდა და მინიმუმ უნდა დაველოდოთ გუნდის გამოჯანმრთელებას რომ გავაკეთოთ შეფასებები თამაშის სტილზე.

დასასრულისკენ განვმეორდები, ტენ ჰაგის მიმართ კრიტიკის უდიდესი წილი, მგონია რომ მაინც რონალდოს და დე ხეას (როგორც ჩემს შემთხვევაში) ინციდენტებს უკავშირდება, კლუბის ამ ორი ლეგენდის გარდა სხვა ნებისმიერი ფეხბურთელი ეგრე რომ ამოეგდო გუნდიდან და გაეშვა, მე პირადად, პრობლემა არ მექნებოდა, თუნდაც სანჩოს მდგომარეობა რომ შევაფასოთ, შესაძლოა საერთოდ უფასოდაც კი გაუშვას გუნდიდან, მაგრამ პრეტენზია არ მაქვს, მეტიც რაც უფრო გაწმენდს გუნდს უკეთესი იქნება ჩემი აზრით.

იმსახურებს თუ არა მეტ დროს ტენ ჰაგი?

დიახ

არა

ხმის მიცემა შედეგები