პრემიერ ლიგის 2022/23 წლების სეზონი ოფიციალურად დასრულდა, საკუთარი შეხვედრა "ოლდ ტრაფორდზე" ერიკ ტენ ჰაგის "მანჩესტერ იუნაიტედმა" გამარჯვებით დაასრულა. გთავაზობთ სპეციალისტის მატჩისშემდგომ ინტერვიუს.

27 საშინაო მოგება სეზონში

"ძალიან გვინდოდა მოგება. "ფულჰემი" კარგი გუნდია, რომელმაც შესანიშნავი სეზონი ჩაატარა, მაგრამ ვფიქრობ, ამ მატჩში ბევრი შანსი შევქმენით. ასე რომ, ბედნიერი ვარ ამ გამარჯვებით, კმაყოფილი ვარ მესამე ადგილით და ბედნიერი, რომ ჩვენ დავამყარეთ რეკორდი აქ "ოლდ ტრაფორდზე" ამ სეზონში 27 საშინაო მოგებით. ეს დიდი მიღწევაა".

დავისაჯეთ პასიური დასაწყისის გამო

"მატჩის დასაწყისი რთული იყო, უდისციპლინოები და მოუწესრიგებლები ვიყავით და ამის გამო დაგვსაჯეს. მაგრამ ამის შემდეგ გუნდმა კვლავ გამოიჩინა მონდომება, ბურთის ფლობით და მის გარეშე კარგად გადავეწყვეთ, კარგი ტემპი ავიღეთ და ბევრი მომენტი შევქმენით. მოედნის ბოლო მესამედი ჩვენი იყო, კარგად ვაპრესინგეთ და მეტოქეს სერიოზული პრობლემები შევუქმენით".

დე ხეას სეივი - გადამწყვეტი მომენტი

"ვფიქრობ, ეს იყო მატჩის გარდამტეხი მომენტი. დავიდის სეივი ბრწყინვალე იყო - მან აიძულა ჩვენი გუნდი გაეთანაბრებინა თამაში და მოეგო ეს მატჩი. შესვენებაზე ფეხბურთელებს სიმშვიდის შენარჩუნება ვთხოვეთ. ავამაღლეთ როგორც გუნდური, ისე ინდივიდუალური თამაშის დონე და გამარჯვება სრულიად დამსახურებული იყო. ეს გვაძლევს თავდაჯერებულობას მომავალ კვირას მატჩის წინ".

ინვესტიციის საჭიროება

"კლუბმა კარგად იცის, რომ თუ ჩვენ გვინდა წინსვლა, გვინდა ვიყოთ ოთხეულში, გვსურს ვიბრძოლოთ ტიტულებისათვის ასეთ ძლიერ ჩემპიონატში, მაშინ გვჭირდება ინვესტიციები, თორემ ამ ყველაფრის შანსი არ გვექნება. . ჩვენ ვნახეთ, რომ ზამთარში ჩვენს ირგვლივ მყოფმა კლუბებმა გუნდებში დიდი ფულის ინვესტიცია მოახდინეს. ჩვენ ეს არ გავაკეთეთ, მაგრამ ჩემპიონატში მაინც მესამე ადგილი დავიკავეთ, ამიტომ ძალიან ბედნიერი და ვამაყობ ჩემი გუნდით".

ჩვენ შეგვიძლია დავამარცხოთ "სიტი"

"ფეხბურთში ყოველთვის გაქვს შანსი. ჩვენ უკვე დავამარცხეთ ისინი იანვარში და "იუნაიტედმა" ბოლო წლებში არაერთხელ დაამარცხა "სიტი". ამ მოთამაშეებმა იციან, რომ როდესაც ისინი უმაღლეს დონეზე თამაშობენ, შეუძლიათ ნებისმიერ გუნდს შეეჯიბრონ. გასაგებია, რომ ჩემპიონატის საუკეთესო გუნდთან მატჩი გვაქვს, მაგრამ შანსი გვაქვს და ეს უნდა გამოვიყენოთ. ყველაფერი უნდა მივცეთ და საბაბს არ ვეძიოთ", - განაცხადა დასასრულს ერიკ ტენ ჰაგმა.