"მანჩესტერ იუნაიტედის" ყოფილი ფორვარდი შერინგემი "წითლების" ახალგაზრდა ვინგერის შესახებ საუბრობს. მისი აზრით, ანტონიმ კრიშტიანო რონალდოსგან უნდა აიღოს მაგალითი.

ბრაზილიელი ფეხბურთელი "მანჩესტერს" 2022 წელს შეურთდა 85 მილიონი ფუნტის სანაცვლოდ. მისი სადებიუტო სეზონი არც თუ ისე შთამბეჭდავია, ანტონის ანგარიშზე 8 გოლი და 2 საგოლე გადაცემაა.

ის დიდი კრიტიკის ქარცეცხლში მოექცა სათამაშო სტილის გამო. ერთ დროს რონალდოც მსგავსი ფაქტის წინაშე იდგა, თუმცა საბოლოოდ პორტუგალიელმა უამრავი ტიტულის და 5 ოქროს ბურთის მოგება შეძლო.

"მაინტერესებს რას ფიქრობს ფერგი ანტონიზე. ის არის ფეხბურთელი, რომელიც შეიძლება თამაშის დროს დიდი ხნის განმავლობაში საერთოდ არ ჩანდეს. მას შეუძლია ზედმეტი ტრიუკების კეთება, საოცარი გოლების გატანა.

ანტონი არ არის ფერგიუსონის სტილის მოთამაშე, რადგან ფერგის მოსწონს უფრო თანმიმდევრული ფეხბურთელები. ვიცი, ანტონიმ გაიტანა მნიშვნელოვანი და შესანიშნავი გოლები, ის ნამდვილად ნიჭიერია. მთავარია პრემიერ ლიგის შესახებ მეტი ისწავლოს, როგორც ოდესღაც კრიშტიანომ.",-აცხადებს შერინგემი.