გუშინ გამართული დერბი მეტად ემოციური და სასიხარულო აღმოჩნდა ერიკ ტენ ჰაგის გუნდისა და მისი გულშემატკივრებისათვის.

"მანჩესტერ იუნაიტედმა" ხოსეპ გვარდიოლას "სიტი" დრამატულ ბრძოლაში დაამარცხა და ჩემპიონობისთვის რბოლაშიც ჩაერთო.

თამაშის შემდეგ "წითელი ეშმაკების" ნახევარმცველმა ბრუნო ფერნანდეშმა თანაგუნდელების და ზოგადად გუნდის მიმართ საქებარი სიტყვები არ დაიშურა.

ფეხბურთელის თქმით გუნდი შეკრული და ერთიანი იყო ხოლო ამ სიტყვებს მოგვიანებით სხვა ინტერპრეტაცია მიეცა.

კერძოდ ბრუნოს აღნიშნულ განცხადებაზე მიაწერეს, რომ თითქოს ეს კრიშტიანუ რონალდუს გუნდიდან წასვლას დაუკავშრა. ამ მოსაზრებებს კი პორტუგალიელი თავად გამოეხმაურა.

"ნუ გამოიყენებთ ჩემს სახელსა და სიტყვებს რონალდუზე თავდასასხმელად. კრიშტიანუ ჩვენი გუნდის ნაწილი იყო სეზონის პირველ ნახევარში და ყველა გაოცებული იყო მისი აქ ყოფნით", - წერს ფერნანდეში სოციალურ ქსელში.

"მანჩესტერ იუნაიტედი" პრემიერ ლიგის მომდევნო მატჩს 18 იანვარს სტუმრად "კრისტალ პალასის" წინააღმდეგ გამართავს.