"მანჩესტერ სიტი" უარყოფს, რომ კრიშტიანუ რონალდუ ახლოს იყო გასულ წელს "ეტიჰადზე" გადასვლასთან.
გულახდილი ინტერვიუს დროს, რომელიც რონალდუმ პირს მორგანს მისცა, სხვა მოვლენებთან ერთად ისიც განაცხადა, რომ "მანჩესტერ იუნაიტედში" დაბრუნებამდე თითქმის გადავიდა "სიტიში".
რონალდუს თქმით, "ქალაქელებთან" ხშირი მოლაპარაკებები ჰქონდა, გეგმების შეცვლაში მთავარი მოქმედი პირი კი საქმეში სერ ალექს ფერგიუსონის ჩარევა იყო, რომლის ხელმძღვანელობითაც პორტუგალიელი 2003 წლიდან 2009 წლამდე "იუნაიტედში" თამაშობდა.
თუმცა "სიტის" წყარო ირწმუნება, რომ რონალდუ არასოდეს ყოფილა "ეტიჰადზე" გადასვლასთან ახლოს. "ქალაქელთა" ინტერესი კრიშტიანუს მიმართ ნამდვილად არსებობდა, მაგრამ "პირობითი" იყო, ხოლო 37 წლის ფეხბურთელის სიტყვები რეალობას არ ასახავენ.