"აიაქსის" მთავარმა მწვრთნელმა ერიკ ტენ ჰააგმა "მანჩესტერ იუნაიტედის"მხრიდან მის მიმართ არსებულ ინტერესზე კომენტარი გააკეთა, რომელსაც ქვემოთ შემოგთავაზებთ.

"მე მხოლოდ ამ სეზონზე ვარ კონცენტრირებული. ყველა ძალა ჩადებულია არსებულ შემადგენლობაში. მომავალ სეზონზე არ ვფიქრობ. მსურს ამ სეზონიდან მაქსიმუმი მივიღო, ჩვენ ჯერკიდევ შეგვიძლია 2 თასის მოგება“, - ციტირებს ჰააგის სიტყვებს "აიაქსის" ოფიციალური საიტი.

მანამდე ბრიტანულ მედიაში გავრცელდა ინფორმაცია, რომლის მიხედვითაც, "წითელი ეშმაკების" ხელმძღვანელობა გუნდის მთავარი მწვრთნელის პოსტზე ჰოლანდიელი სპეციალისტის კანდიდატურას განიხილავს.

"აიაქსი" ევროპული ტურნირებიდან გამოეთიშა, მაგრამ ჰოლანდიის ჩემპიონატის მოგების შანსი გუნდს მაინც აქვს.

სეზონის დასრულებამდე რვა ტურით ადრე ამსტერდამელები სატურნირო ცხრილში ლიდერობენ და უახლოეს მდევარს ორი ქულით უსწრებს.

ასევე ტენ ჰააგის შეგირდები 17 აპრილს ჰოლანდიის თასის ფინალში "პსვ"-ეს დაუპირისპირდებიან.