როგორც უკვე მოგეხსენებათ, კლუბის ოფიციალურ ვებ-საიტმა გერმანელი სპეციალისტის რალფ რანგნიკის მთავარ მწვრთნელად დანიშვნის შესახებ ოფიციალური განცხადება გამოაქვეყნა. კომენტარი თავად რანგნიკმაც გააკეთა რომელსაც ქვემოთ შემოგთავაზებთ.

"ძალიან მოხარული ვარ, რომ შევუერთდი "მანჩესტერ იუნაიტედს" და ფოკუსირებული ვიქნები იმაზე, რომ ეს სეზონი წარმატებული იყოს კლუბისთვის.

გუნდი სავსეა ნიჭიერი მოთამაშეებით, მასში გაერთიანებულია გამოცდილება და ახალგაზრდობა. მთელი ჩემი ძალისხმევა მომდევნო ექვსი თვის განმავლობაში იქნება მიმართული იმისთვის, რომ დავეხმარო მოთამაშეებს თავიანთი პოტენციალის ამაღლებაში - როგორც ინდივიდუალურად, ასევე, რაც მთავარია, გუნდურად.

გარდა ამისა, მოუთმენლად ველი კლუბის გრძელვადიან გეგმებს, როგორც კონსულტანტის თანამდებობიდან", - ნათქვამი მენეჯერის განცხადებაში

კლუბმა ასევე განაცხადა, რომ გუნდს მანამ, სანამ რანგნიკი სამუშაო ვიზას მიიღებს მაიკლ კერიკი უხელმძღვანელებს. "იუნაიტედმა" ასევე ოფიციალურად გამოუხატა მადლობა მოსკოვის "ლოკომოტივს" თანამშრომლობისთვის.