ჟურნალისტებისთვის მიცემულ ინტერვიუში, "მანჩესტერ იუნაიტედის" ფრანგმა ნახევარმცველმა პოლ პოგბამ კლუბის ახალწვეულები რაფაელ ვარანი და კრიშტიანუ რონალდუ შეაფასა.

"განსაკუთრებით კლუბისათვის, რაფაელ ვარანის ჩამოსვლა და ჩვენს რიგებში ხილვა პოზიტიურია. დიდი ხანია ვიცნობთ ერთმანეთს და ძალიან კარგი ურთიერთობა გვაქვს. მიხარია რომ ვარანი ჩვენთან ერთადაა, გუნდში ის გამოცდილებას და კარგ თვისებებს შემოიტანს.

რაც შეეხება კრიშტიანუ რონალდუს - საუკეთესოებთან ერთად თამაში სასიამოვნოა. ეს არის სტიმული და ბიძგი გუნდისათვის რომ სათამაშო დონე უფრო გაიზარდოს. გვსურს, რომ ყველაფერი კარგად წარიმართოს". - განაცხადა დასასრულს პოლმა Telefoot - ისთვის მიცემულ ინტერვიუში.

შეგახსენებთ, რომ პოგბას "წითელ ეშმაკებთან" კონტრაქტი ჯერ კიდევ არ გაუხანგრძლივებია, ხელშეკრულება მომავალ წელს იწურება.

იმ შემთხვევაში თუ ახალი კონტრაქტი ვერ გაფორმდა, ფრანგ ნახევარმცველს, უკვე იანვარში შეეძლება ნებისმიერ კლუბთან მოლაპარაკებების წარმოება და წინასწარი შეთანხმების დადება.