პრემიერ ლიგის გასულ ტურში, ოლე გუნარ სოლსკიაერის "მანჩესტერ იუნაიტედი" დევიდ მოიესის "ვესტ ჰემს" გაუმასპინძლდა და მინიმალური ანგარიშით ძლევის შემდგომ საკუთარ აქტივში სამი ქულა ჩაიწერა.

"წითელ ეშმაკებს" გამარჯვებაში ავტოგოლი დაეხმარა. აღნიშნული მატჩის შემდეგ, "მანჩესტერელთა" შოტლანდიელმა ფეხბურთელმა სკოტ მაკტომინეიმ განაცხადა, რომ მისთვის მთავარია შედეგი და არა ფეხბურთის დემონსტრირება.

"მიმდინარე სეზონში ბევრი მოუგებელი მატჩები დაგვიგროვდა. ისეთი როგორიც იყო მატჩი "ევერტონთან", ასევე გასულ კვირას ევროპა ლიგის მატჩი "მილანთან".

სწორედ ეს უნდა გავაუმჯობესოთ, შედეგები უნდა გავაუმჯობესოთ. დასაძრახი არ არის ის, თუ როგორი გზით ვითამაშეთ "ვესტ ჰემის" წინააღმდეგ. ეს რთული თამაშია, და შენ ყველაფერი პროფესიონალურად უნდა გააკეთო, რომ გაიმარჯვო.

ვიცი, რომ ეს არცთუ ისე გლამურული გზაა გასამარჯვებლად, ხალხს მსგავსად არ სურს უყუროს შეხვედრებს, მაგრამ ყოველთვის ვერ შეძლებ გაიმარჯვო 4-0 ან 5-0. ჩვენ ვცდილობთ ამას, თუმცა ისეთ მატჩებში რომელიც ბოლოს გავმართეთ, უბრალოდ საჭიროა რომ გაიმარჯვო". - ციტირებს Sky Sports - მაკტომინაის სიტყვებს.