ოლე გუნარ სოლსკიაერს მიაჩნია, რომ მიმდინარე სეზონში ჩემპიონთა ლიგაზე ასპარეზობის შემთხვევაში ბრენდონ უილიამსსა და მეისონ გრინვუდს იმდენივე სათამაშო პრაქტიკას ვერ მისცემდა, რამდენიც ამ უკანასკნელებმა მიიღეს.

2018/2019 წლების სეზონის პრემიერ ლიგაში მექვსე ადგილზე გასვლის შედეგად "იუნაიტედმა" მომდევნო მიმდინარე სეზონი ევროპა ლიგაზე გაატარა, სადაც მეოთხედფინალურ ეტაპზე იმყოფება.

სწორედ ამ ტურნირზე შედგა 18 წლის გრინვუდის პირველი კარიერული გოლი "ასტანას" წინააღმდეგ, 19 წლის უილიამსმა კი სადებიუტო მატჩი "აზ ალკმაარის" წინააღმდეგ ჩაატარა და ჯამში ექვსჯერ მოხვდა ტურნირზე გამართული შეხვედრების სასტარტო შემადგენლობაში.

ჯამში სოლსკიაერმა აკადემიის აღზრდილ რვა ფეხბურთელს მისცა ევროპა ლიგაზე სადებიუტო მატჩის ჩატარება და აქიდან 6 "ასტანასთან" მატჩში, ამჟამად კი ითენ ლეირდი, ტედენ მენგი და ითენ გელბრეითი კიოლნში იმყოფებიან თანაგუნდელებთან ერთად, სადაც დღეს "კოპენჰაგენს" დაუპირისპირდებიან.

წინა თვეში სოლსკიაერმა ხაზი გაუსვა იმ ფაქტს, რომ მომდევნო სეზონში ის ვერ შეძლებს როტაციას ისევე ხშირად მიმართოს, როგორც ამას ახლა აკეთებს: "ამ სეზონს იმ ლოგიკით მივუდექით, რომ ევროპა ლიგა შესანიშნავი შანსია ჩვენთვის. პირველი: ტიტულის მოგება, ტურნირზე შორს გასვლა და ასევე რამდენიმე ახალგაზრდა ფეხბურთელისთვის შანსი მიცემა, რაც იდეალური შესაძლებლობაა.

ჩემპიონთა ლიგაზე რომ ვყოფილიყავით... რა თქმა უნდა, ჩემპიონთა ლიგაზე თამაში გვინდა, მაგრამ ბრენდონის მსგავს ფეხბურთელებს ისე ხშირად ვერ ვათამაშებდით, როგორც ახლა. მეისონსაც ასევე, სხვა ახალგაზრდა ბიჭებს, რომელთაც კარიერა ფანტასტიკურად დაიწყეს.

ევროპა ლიგა ყოველთვის იყო შემადგენლობის ერთად შეკვრის, ჯგუფურად მუშაობისა და ხალხისთვის შანსის მიცემის საშუალება. ბრენდონი ახლა ჩემ გვერდით ზის და ევროპა ლიგის მეოთხედფინალში სათამაშოდ ემზადება, რაც მისთვის დიდებული მიღწევაა. თან შესანიშნავად თამაშობდა.

მთელი სეზონის განმავლობაში ვვითარდებოდით. ჩვენი შემადგენლობა მანამდეც ერთად შრომობდა, და რა თქმა უნდა, იანვარში კიდევ განვახორციელეთ ცვლილებები, რამაც უფრო გაგვაძლიერა.

თუმცა, გუნდური შრომა, რასაც ჩვენ ვაღწევდით, ჯგუფს უფრო და უფრო კრავდა, რაც უფრო ბუნებრივ სახეს იღებს და ამის ხარჯზე კარგ ფორმაშიც ჩავდექით.

კარგი ფეხბურთელები გვყავს, ფეხბურთელები, რომლებიც ტრავმის შემდეგ დაბრუნდნენ. 23 მატჩში მხოლოდ ერთხელ დამარცხება ძალიან კარგი შედეგია".

წყარო: M.E.N.