"პარი სენ-ჟერმენის" თავდამსხმელი, ედისონ კავანი სეზონის ბოლოს პარიზულ კლუბს დატოვებს. ურუგვაელ ფორვარდს, საფრანგეთის მოქმედ ჩემპიონთან კონტრაქტი, ივლისამდე აკავშირებს, რაც იმას ნიშნავს, რომ მსურველ კლუბს მისი გადაბირება უფასოდ შეეძლება.

33 წლის თავდამსხმელს მსურველების სია საკმაოდ დიდია. "მადრიდის ატლეტიკოს", "მილანის ინტერისა" და "ბოკა ხუნიორსის" შემდეგ, მისი გადაბირების სურვილი "მანჩესტერ იუნაიტედმაც" გამოთქვა. აღნიშნულ ინფორმაციას ესპანური AS ავრცელებს.

თავის მხრივ, "პსჟ-ში" არსებული ბოლოდროინდელი ვითარებით, კავანი უკმაყოფილოა და პარიზელთა დატოვება მტკიცედ აქვს გადაწყვეტილი. ურუგვაელი შემტევი, ზამთარში "ატლეტიკოში" გადასვლასთან საკმაოდ ახლოს იყო, მაგრამ "პარი სენ-ჟერმენმა" "როხიბლანკოს" მის სანაცვლოდ, საკმაოდ სოლიდური თანხა მოსთხოვა.

ურუგვაელი ფორვარდი "პსჟ-ში" 2013 წლის ზაფხულში, ნაპოლიდან 64.5 მილიონი ევროს სანაცვლოდ გადავიდა. პარიზული კლუბის მაისურით გამართულ 301 მატჩში, მის ანგარიშზე 200 გოლი და 43 საგოლე გადაცემაა.

http://sportwitness.co.uk/