"მანჩესტერ იუნაიტედის" მეკარის აღზევება "შეფილდ იუნაიტედის" რიგებში იჯარით ყოფნისას
ექსპერტების აზრით, მომავალში დინ ჰენდერსონს ყველაფრის მიღწევა შეუძლია, თუნდაც იქცეს შემდეგ სეზონში ეშმაკების პირველ არჩევნად.
ასეთივე ვერდიქტი გამოაქვს მის თანაგუნდელს "შეფილდ იუნატიედში" და ყოფილ ეშმაკს, ოლივერ ნორვუდს, რომელმაც MEN Sport-თან ჰენდერსონის შესახებ კომენტარი გააკეთა.
ნორვუდმა აღნიშნა, რომ მომავალში "შეფილდის" ბოსს, კრის უაილდერს სურს 22 წლის მეკარის იჯარის ვადის გახანგრძლივება მესამე წლამდე, მაგრამ ასევე არის შანსი რომ "მანჩესტერ იუნაიტედმა" იგი დაიბრუნოს საკუთარ რიგებში, რათა დავიდ დე ჰეას კონკურენცია გაუწიოს.
ნორვუდი, 28 წლის ნახევარმცველი, რომელიც მანჩესტერულ ახალგაზრდულ გუნდში პოლ პოგბას და ჯესი ლინგარდის თანაგუნდელი იყო, დინ ჰენდერსონისთვის საქებარი სიტყვები არ დაიშურა.
"ის დიდებულია. ის ნამდვილად კარგად თამაშობს და ძალიან გაიზარდა ამ სეზონის მანძილზე".
"ვფიქრობ, როდესაც მასთან ერთად პირველად ვითამაშე, გასული სეზონი ბოლოს, ის კვლავ პატარა, ახალგაზრდა მოთამაშე იყო".
"ახლა კი მის თამაშში შეამჩნევთ დეტალებს, რომლებიც აუცილებელია, რათა უმაღლესი დონის მატჩები ჩაატარო".
"ის მიმდინარე სეზონში შესანიშნავია. სეივები, რომლებსაც იგი აკეთებს, მატჩების რაოდენობა, რომლებშიც იგი კარს მშრალად ინახავს პრემიერ ლიგაში - ეს ფაქტები ყველაფერზე მეტყველებს. მაგრამ ამის გამო მის წინ მდგომი ბიჭები - დაცვის ხუთეული, არ უნდა დაგვავიწყდეს".ნორვუდს წარმოდგენა არ აქვს, თუ სად ითამაშებს შემდეგ სეზონში უაითჰევენში დაბადებული მეკარე, მაგრამ იმაში დარწმუნებულია, რომ იგი ნებისმიერ გუნდში მიაღწევს წარმატებებს.
ჰენდერსონმა, გასულ ზაფხულს, პრემიერ ლიგაში ნორვუდთან ერთად აღზევების შემდეგ, ახალ 3-წლიან კონტრაქტს მოაწერა ხელი "მანჩესტერ იუნაიტედთან", რაც იმაზე მეტყველებს, რომ მას სამომავლო გეგმები აქვს ოლდ ტრაფორდზე.
კითხვაზე, თუ სად ითამაშებს შემდეგ სეზონში ჰენდერსონი, ნორვუდმა მარტივად უპასუხა:
"ეს ჩემი სალაპარაკო არ არის, თუ სიმართლე გაინტერესებთ. ეს კლუბების პოლიტიკის ნაწილია".
"მას ბევრი შესაძლებლობა აქვს. თუ სეზონის ბოლოს დაგვტოვებს, ჩვენ ყველაფერ საუკეთესოს ვუსურვებთ, მაგრამ მაინც ვიმედოვნებთ რომ ჩვენთან დარჩება, რადგან ფანტასტიკური მეკარეა".
"დინს დიდი მომავალი აქვს, ამას ჩემი თქმა არ სჭირდება, მას შეუძლია მიაღწიოს ნებისმიერ მიზანს თუ მოინდომებს, რადგან ამისთვის საჭირო უნარები გააჩნია".
"თუ არ გაჩერდება და მუშაობას გააგრძელებს, მე ვერ ვხედავ მიზეზს, თუ რატომ ვერ უნდა აღმოჩნდეს მსოფლიოს საუკეთესო მეკარეებს შორის".წყარო:
MEN