ოლე გუნარ სოლსკიაერს მიაჩნია, რომ "მანჩესტერ იუნაიტედის" ნახევარმცველთა დუეტი, სკოტ მაკტომინეისა და ფრედის წყვილის კარგი შეთამაშება არის მიზეზი ბოლო დროინდელი კარგი შედეგებისა.
ოქტომბერში ჩატარებული 6 მატჩიდან ოთხი მაკტომინეიმ და ფრედმა ძირითად შემადგენლობაში დაიწყეს და ნორვეგიელის აზრით, მათი გაუმჯობესებული პარტნიორობა დივიდენდებს იღებს.
"მაკტომინეი ბრწყინვალე იყო და ახლა მას და ფრედ კარგი პარტნიორობა აქვთ ჩამოყალიბებული. ერთად კარგად თამაშობენ. ამას გასულ სეზონშიც ახერხებდნენ - იყო რამდენიმე მატჩი, სადაც კარგად გამოიყურებოდნენ, როცა ტრავმიანობა გვაწუხებდა, როგორც პსჟ-სა და "არსენალის" წინააღმდეგ შეხვედრებში.
ახლა წყვილში მუშაობენ, მაგრამ სკოტი ყოველთვის ბრწყინვალე იყო", - განაცხადა სოლსკიაერმა.
როცა გუნდის კაპიტანი ეშლი იანგი არ არის სასტარტო შემადგენლობაში, გუნდს სხვადასხვა ფეხბურთელი კაპიტნობს - დავიდ დე ხეა, აქსელ ტუანზებე და ნემანია მატიჩი.
"ჩელსისთან" მოპოვებული გამარჯვებისას კი თანაგუნდელებს გასახდელიდან ჰარი მაგუაიერი მიუძღოდა წინ, თუმცა ოლე გუნარს მიაჩნია, რომ მომავალში მაკტომინეიც გახდება ავტორიტეტული ფიგურა თანაგუნდელებისთვის. "სკოტი ლიდერია, ის "იუნაიტედის" ბიჭია, ბევრი ეტაპი განვლო. "ნორვიჩთან" ნახევარი ბრუნით გატანილი გოლით თუ ვიმსჯელებთ, იმის თქმაც შეიძლება, რომ ფორვარდადაც კარგად ითამაშებს, მაგრამ ნახევარდაცვაში ძალიან კარგად ვითარდება".