ოლე გუნარ სოლსკიაერი აცხადებს, რომ "მანჩესტერ იუნაიტედი" ტრიოს ჯანმრთელობის შესახებ ცნობებს ელოდება.
"ბორნმუთთან" მატჩის წინა პრესკონფერენციაზე მწვრთნელმა იმედი გამოთქვა, რომ ჰარი მაგუაიერი, ვიქტორ ლინდელოფი და მარკუს რეშფორდი "ჩელსისთან" მიღებულ დაზიანებას მოირჩენენ და მომდეცნო შეხვედრისთვის მზად იქნებიან.
"ჯერ კიდევ ადრეა რამის თქმა. იმედი მაქვს, ხვალ მოედანზე ვიხილავთ სამივე მათგანს. გარკვეული მკურნალობა ჩაიტარეს გუშინ და ცოტა მეტი დღესაც, მსუბუქი სესია იყო და იმედია, მზად იქნებიან. ჯერჯერობით ვერაფერს გეტყვით დაზუსტებით", - განაცხადა ოლე გუნარმა.
"ბორნმუთთან" სტუმრობა ძალიან ნაადრევი გამოდის აქსელ ტუანზებეს, ლუკ შოუსა და ნემანია მატიჩისთვის, რომლებიც ნამდვილად ვერ ითამაშებენ შაბათს. "დიახ, ისინი ნამდვილად არ არიან მზად. სავარაუდოდ, სანაკრებო პაუზის შემდეგ შემოგვიერთდებიან. ყოველთვის სარისკოა დროზე ადრე მათი გამოწვევა, მაგრამ სანაკრებო პაუზის შემდეგი ორი კვირის განმავლობაში ნამდვილად უნდა შეძლონ გამოჯანმრთელება".
რაც შეეხება პოლ პოგბას, მისი უქმობის შესახებ მთავარმა მწვრთნელმა უკვე განაცხადა და დაადასტურა, რომ ფრანგი დეკემბრამდე ვერ ითამაშებს.
ერიკ ბაიი კი ოპერაციის გაკეთების შემდეგ სარეაბილიტაციო პროცესს გადის.