"მანჩესტერ იუნაიტედის" თავდამსხმელის, მარკუს რეშფორდის ირგვლივ გავრცელებული სპეკულაციების ფონზე პრესაში გამოჩნდა ინფორმაცია იმის შესახებ, რომ ახალგაზრდა ინგლისელი "იუნაიტედთან" ახალი კონტრაქტის გაფორმებისთვის ემზადება.

რეშფორდი კლუბის სისტემაში ექვსი წლიდან ირიცხება და 2016 წლის თებერვალში პირველი გუნდის შემადგენლობაში ჩატარებული სადებიუტო შეხვედრის შემდეგ მან 170 მატჩი ჩაატარა, რომლებშიც 45 გოლი გაიტანა.

თუმცა, პრესა აქამდე ირწმუნებოდა, რომ რეშფორდი ხელფასის გაზრდა მოითხოვდა კვირაში 350 ათასი ფუნტის ოდენობით, რისი დაუკმაყოფილებლობის შემთხვევაშიც კლუბს დატოვებდა.

მდგომარეობას ართულებს ისიც, რომ ინგლისის ნაკრების ფეხბურთელს მოქმედი კონტრაქტით მხოლოდ ერთი წელი აკავშირებს კლუბთან, თუმცა "ოლდ ტრაფორდის" მკვიდრებს კონტრაქტის კიდევ ერთი წლით გახანგრძლივების უფლება აქვთ.

გამოცემა The Times-კი იტყობინება, რომ "იუნაიტედს" 21 წლის ფეხბურთელის დაკარგვა არ ემუქრება. ამჟამად მოლაპარაკებები დასასრულს უახლოვდება და მარკუსი მალე უგულებელყოფს "ბარსელონას" ინტერესს მის მიმართ და ახალ კონტრაქტს გააფორმებს "წითელ ეშმაკებთან".