"მანჩესტერ იუნაიტედის" ფორვარდი იტალიაში "ინტერის" წარმომადგენლებთან შესახვედრად და კონტრაქტის პირობების შესათანხმებლად გაფრინდა.
ბელგიელმა ძირითადში ადგილი ვერ დაიმკვიდრა და როგორც ოლე გუნარის პრესკონფერენციებიდან ჩანს, ამას ვერც მომავალ სეზონში მოახერხებს. შესაბამისად, ფორვარდმა კლუბის დატოვება გადაწყვიტა.
"იუნაიტედმა" 2017 წელს ლუკაკუს შესაძენად 75 მილიონი ფუნტი გადაიხადა, თუმცა ახლა "წითლები" მზად არიან, რომ ბელგიელი იტალიელებს 55 მილიონი ფუნტის სანაცვლოდ მიყიდონ.
"ინტერი" "იუნაიტედისგან" განსხვავებით მომავალ სეზონში ჩემპიონთა ლიგაზე ითამაშებს, რამაც ლუკაკუს გადაწყვეტილების მიღება უფრო გაუადვილა.
"ინტერის" მწრთვნელი ანტონიო კონტე ლუკაკუს შეძენას ჯერ კიდევ "სტემფორდ ბრიჯზე" ყოფნისას ცდილობდა, თუმცა - უშედეგოდ.
ლუკაკუ იტალიაში ერთი თვის წინ უკვე იყო და ტრანსფერის დეტალები შეათანხმა. ლუკაკუ "ინტერში" ცოტათი ნაკლებ ხელფასს მიიღებს, ვიდრე - "იუნაიტედში". შეგახსენებთ, რომ ბელგიელის კონტრაქტი "ოლდ ტრაფორდზე" კვირაში 250 000 ფუნტს წარმოადგენდა.