"მანჩესტერ იუნაიტედის" ყოფილმა ფორვარდმა უეინ რუნიმ "წითლების" მწრთვნელზე ოლე გუნარ სოლსკიაერზე ისაუბრა. მისი აზრით, თუ ოლეს წარმატების მიღწევა სურს ფეხბურთელებში შიში უნდა დანერგოს.
სოლსკიაერი "მანჩესტერ იუნაიტედის" შემცვლრლ მწრთვნელად 2018 წლის დეკემბერში დაინიშნა და პირველი 19 მატჩიდან 14 მატჩში შეძლო გამარჯვების მოპოვება.
თუმცა მარტის შემდეგ, "მანჩესტერ იუნაიტედმა" ათი მატჩიდან მხოლოდ ორში გაიმარჯვა, რის შედეგადაც "წითლები" ოთხეულს მიღმა დარჩნენ.
"ვფიქრობ, რომ ფეხბურთელებს რაღაცის უნდა ეშინოდეთ. უნდა ეშინოდეთ ოლე გუნარის, უნდა ეშინოდეთ მაიკლ ქერიკის. რა თქმა უნდა, პატივს უნდა სცემდნენ, მაგრამ ამასთანავე უნდა ეშინოდეთ."
"ძალიან რთული სიტუაციაა. ჩემთვის ყოველთვის რთული გადასატანია, როცა ვხედავ, რომ "მანჩესტერ იუნაიტედი" წვალობს და იტანჯება. ოლემ შესანიშნავად დაიწყო ყველაფერი, ფეხბურთელებს ცოტაოდენი თავისუფლება მისცა და ყველა კარგად ხედავდა, რომ ისინი თამაშისგან სიამოვნებას იღებდნენ. მოსწონდათ გამარჯვება და ძალიან კარგად თამაშობდნენ."
"მაგრამ უცებ ყველა ფეხბურთელის სახელი სხვადასხვა კლუბს დაუკავშირდა. არ ვიცი რა მხოდა, მაგრამ ფაქტი ერთია - ბოლო შვიდი მატჩი არ ჩაუტარებიათ ისეთი თამაში, როგორის ჩატარებაც შეეძლოთ და ეს ლიგის ფასად დაუჯდათ."
"ფებხურთი შეიცვალა. ფეხბურთელებს დღეს წაგების შემდეგ კარგ ხასიათზე ყოფნა და სოციალურ მედიაში სხვადასხვა რეკლამის განთავსება შეუძლიათ. როცა გულშემატკივრები ამაზე უკმაყოფილებას გამოთქვამენ ისინი ყოველთვის მაკრეტინგის ხალხს ადანაშაულებენ."
"მოდით, თქვენს თავზე აიღეთ პასუხისმგებლობა. ისინი ხომ თქვენთვის მუშაობენ. მეც მყავს ხალხი, რომლებიც ჩემს სოციალურ ქსელებს განაგებენ, მაგრამ ჩემი ინსტრუქციის გარეშე იქ არაფერს განათავსებენ. ამიტომ ყველამ უნდა აიღოთ ამაზე პასუხისმგებლობა."
"ამ ფეხბურთელებს დღეს მოსწონთ, როცა ვიღაცის ზურგს ეფარებიან. არ აქვს მნიშვნელობა საქმე სოციალურ მედიას ეხება, თუ მოედანს. მათ საკუთარ თავზე პასუხისმგებლობის აღება უჭირთ," -განაცხადა უეინ რუნიმ.