ჰოლანდიის ნაკრების სილესენი დავიდ დე ხეას შეცვლის უმთავრეს კანდიდატად მოიაზრება, ვინაიდან "მანჩესტერ იუნაიტედში" ელოდებიან, რომ ესპანელი კიპერი კლუბს ზაფხულში დატოვებს.

30 წლის სილესენმა საჯაროდ განაცხადა, რომ კატალონიაში მარკ ანდრე ტერ შტეგენის სათადარიგო მეკარედ გატარებული სამი წლის შემდეგ "ბარსელონას" დატოვება სურს. "იუნაიტედს" კი აცნობეს, რომ "ბარსა" 25 მლნ. ევროსა და თამაშზე დამოკიდებულებით ბონუსებს მოითხოვს მეკარეში, რომელიც 2016 წელს "აიაქსიდან" გადაიბირა.

დე ხეას მომავალი "ოლდ ტრაფორდზე" ჯერ კიდევ ბუნდოვანია, ვინაიდან მის ახალ კონტრაქტთან დაკავშირებით შეთანხმება ვერ დგება. ესპანეთის ნაკრების წევრს - რომელიც ბოლო შვიდ სეზონში ხუთჯერ დაასახელეს პრემიერ ლიგის ნომერ პირველ მეკარედ - სურს, რომ მისი სტატუსი, როგორც "იუნაიტედის" საუკეთესო ფეხბურთელისა, აისახოს იმავე ოდენობის ხელფასში, რასაც ალექსის სანჩესი იღებს 2018 წლის იანვარში "იუნაიტედში" გადასვლის დღიდან. ედ ვუდვორდმა კი დე ხეას წარმომადგენლებს კატეგორიულად განუცხადა, რომ ხელფასის ასე ზრდა შეუძლებელია.

"იუნაიტედის" აღმასრულებელი დირექტორი აცნობიერებს, რომ შეცდომა დაუშვა, როცა სანჩესს ოთხნახევარი წლით გაუფორმა კონტრაქტი და პრემიერ ლიგის ყველაზე მაღალანაზღაურებად ფეხბურთელად აქცია, დე ხეას კონტრაქტის განახლებისას კი იმავე შეცდომის დაშვება არ სურს.

ესპანელის ბანაკში კი ამტკიცებენ, რომ მიმდინარე სატრანსფერო ბაზარზე მეკარეთა ფასი საგრძნობლად გაიზარდა და უკეთეს პირობებს ნებისმიერ გრანდში შესთავაზებენ.

დე ხეა მომდევნო სეზონის დაწყებიდან კონტრაქტის პირობის იმ ფაზაში შედის, რომელიც კლუბის სურვილის მიერ იქნება ამოქმედებული და ესპანელს უფლებას აძლევს, იანვარში ნებისმიერ ევროპულ კლუბთან აწარმოოს მოლაპარაკებები წინასწარი შეთანხმების საფუძველზე, ხოლო 2020 წლის ზაფხულში კი კლუბი თავისუფალი აგენტის სტატუსით დატოვოს.

გამომდინარე იქიდან, რომ "იუვენტუსი", "პარი სენ-ჟერმენი" და მადრიდის "რეალი" არიან დაინტერესებული დე ხეას სერვისით, "იუნაიტედი" პრაგმატულ მიდგომას და 28 წლის ფეხბურთელის გაყიდვას ამჯობინებს მიმდინარე სატრანსფერო ბაზარზე, მიღებულ შემოსავალს კი ახალი გუნდის შენების პროცესში გამოიყენებს.

დე ხეას შემცვლელთა შორის ბევრი კანდიდატურა განიხილება, მაგრამ სილესენს მათ შორის წამყვანი პოზიცია უჭირავს.

მისი შეძენა "იუნაიტედს" ჯერ კიდევ ლუი ვან გალის პერიოდიდან სურდა, როცა ჰოლანდიელი სპეციალისტი თავის თანამემამულეს ასევე დე ხეას შემცვლელად მოიაზრებდა, ვინაიდან მაშინ დავიდი მადრიდში გადაბარგების ზღვარზე იყო.

სილესენმა "კამპ ნოუზე" გატარებული სამი წლის განმავლობაში 30 მატჩი ჩაატარა და მათი უმრავლესობა კოპა დელ რეის შეხვედრებზე მოდიოდა.

გასულ თვეში ჰოლანდიურ ტელევიზიასთან საუბრისას იასპერმა საჯაროდ განაცხადა: "ჯერ არდადეგებს მოვიწყობ, შემდეგ კი ახალ კლუბს მოვძებნი, სადაც თამაშის საშუალება მექნება".

წყარო: dailyrecord