"მანჩესტერ იუნაიტედის" აღმასრულებელი დირექტორი ედ ვუდვორდი აცხადებს, რომ ოლე გუნარ სოლსკიაერს სრული ფინანსური მხარდაჭერა ექნება კლუბში წარმატების დასაბრუნებლად.

აწ უკვე დასრულებული სეზონი "იუნაიტედმა" მეექვსე ადგილზე დაასრულა.

"ჩვენი ბიზნესის სიძლიერე ნიშნავს, რომ საკმარისი ფინანსური რესურსები გვაქვს ჩვენი მწვრთნელის მხარადჭერისა და მოედანზე წარმატების შექმნისთვის. ეს არის ჩვენი მუდმივი პირველადი მიზანი", - აცხადებს ვუდვორდი.

სოლსკიაერმა "იუნაიტედის" დროებითი მწვრთნელის პოსტი დეკემბერში ჩაიბარა და კლუბს 11-მატჩიანი წაუგებელი სერია ჰქონდა, რომლის განმაცლობაშიც 10 მოიგო.

თუმცა, როგორც კი ნორვეგიელმა გრძელვადიან კონტრაქტს მოაწერა ხელი, გუნდის სათამაშო ფორმა შესუსტდა და სეზონი ოთხეულთან ხუთქულიანი ჩამორჩენით დაასრულა, ბოლო 9 მატჩში კი მხოლოდ 2 მოიგო.

თავად ნორვეგიელს მიაჩნია, რომ პრემიერ ლიგის ტიტულისთვის ბრძოლას ჯერ კიდევ დიდი დრო დასჭირდება.

"ოლდ ტრაფორდის" ბინადრებს 2012/13 წლების სეზონის შემდეგ არ აღუმართავთ ინგლისის უმაღლესი დივიზიონის ტიტული, ბოლო ორი სეზონი კი თასების მოგების გარეშე ჩაატარეს.

"მიუხედავად იმისა, რომ ბოლო რამდენიმე კვირა წარუმატებელი გამოდგა, მოხარულები ვართ, დავადასტუროთ, რომ ოლე ჩვენი მწვრთნელი იქნება სამწლიანი კონტრაქტის საფუძველზე.

კლუბის ყველა წევრი - ხელმძღვანელობა, მწვრთნელი, გუნდი და ყველა აქ მომუშავე ადამიანი - კონცენტრირებულია ინგლისის საფეხბურთო ელიტაში "იუნაიტედის" დაბრუნებაზე და ჩვენ კვლავაც ვაუმჯობესებთ ჩვენს საქმიანობას მოედანზე და მის მიღმა ამ მიზნის მისაღწევად" - დაამატა ვუდვორდმა.

წყარო: bbc.com