სკოტ მაკტომინეიმ მარკო ვერატის შეჩერებაზე ისაუბრა. ახალგაზრდა ნახევარმცველმა პსჟ-სთან საოცარი მატჩი ჩაატარა და "იუნაიტედის" შემდეგ ეტაპზე გასვლაში დიდი წვლილი მიუძღვის.
"როდესაც შენ ისეთი ნახევარმცველის შეჩერება გევალება როგორიც რვა ნომრის ნახევარმცველია, ის უბრალოდ უნდა გაანულო და დარწმუნდე, რომ მოედანზე საერთოდ ვეღარ იქნება. ეს მატჩი პერსონალურ მატჩად უნდა იქცეს და მხოლოდ ამ კონკრეტულ პიროვნებაზე უნდა იყო კონცეტრირებული. უნდა გაიაზრო, რომ მის წინააღმდეგ ხარ და მან თუნდაც მთელი მოედანი ირბინოს, თუნდაც მთელი ღამე ეყოს ენერგია, შენ მას ფეხდაფეხ გაყვები."
"ეს ყველა თამაშში ასე უნდა გააკეთო. ეს მხოლოდ ჩემპიონთა ლიგაზე არ ხდება; ეს უნდა გააკეთო ყველა გასვლით და საშინაო მატჩში, ყველა მატჩში, რადგან გამარჯვება ყოველთვის გჭირდება. არ აქვს მნიშვნელობა რა მდგომარეობაში ხარ, ყველა თამაშში უნდა გაიმარჯვო და ამისთვის ბოლომდე დაიხარჯო."
"არ აქვს მნიშვნელობა ჩემპიონთა ლიგაზე გიწევს თამაში, ლიგა 2-ში თუ ინგლისის თასზე. ყოველთვის ბოლომდე უნდა დაიხარჯო."
"პარიზული საღამო ალბათ საუკეთესო მოგონებაა ჩემს ცხოვრებაში. მახსოვს კიერანს ვესაუბრებოდი თამაშამდე და მან მხოლოდ ერთი რამ მითხრა: "ეს შენი შანსია, გადი სტადიონზე და უბრალოდ ისიამოვნე. უნდა გახვიდე მოედანზე და საკუთარი თავი გამოავლინო და, რაც მთავარია, მაქსიმალურად ისიამოვნო." მთლიანად შევიგრძენი მისი სიტყვები და ყველანაირად ვეცადე, რომ სიამოვნება მიმეღო და თან მოწინააღმდეგისთვის წნეხი არ მომეკლო."
"როდესაც მოედანზე გადიხარ შენი, გუნდის და ყველას ღირსების დაცვა გევალება. ყველა ერთად უნდა იყოს, რათა მიზანს მიაღწიონ და ჩვენ იმ ღამეს ეს შევძელით."