"მანჩესტერ იუნაიტედის" მწრთვნელმა ოლე გუნარ სოლსკიაერმა აღიარა, რომ ამ დროის განმავლობაში მან საკუთარი თავის შესახებ ძალიან ბევრი რამ ისწავლა, მთავარი კი არის ის, რომ მას საშინლად სძულს წაგება.
შეგახსენებთ, რომ ოლემ "წითლები" დეკემბერში ჩაიბარა და ყველასთვის საოცნებო სტარტი აიღო, თუმცა სეზონი ასეთივე კარგ ნოტაზე არ დასრულებულა. ნორვეგიელი ოპტიმისტურ განწყობას მაინც ინარჩუნებს და მიიჩნევს, რომ კლუბის თავიდან აწყობის შანსები აქვს და ამ შანსებს აუცილებლად გამოიყენებს.
"მთავარი რაც ვისწავლე არის ის, რომ არ მიყვარს წაგება. მომწონს, როცა ვიგებ. ჩვენ ყველაფერი ფანტასტიკურად დავიწყეთ. ბიჭები დაუჯერებლები იყვნენ ჩემი მოსვლისას. ძალიან თავდაჯერებულები ვიყავით და გულშემატკივარს დადებით განწყობას ვუქმნიდით. ბევრი მატჩი მოვიგეთ. საშინლად მომწონდა და მსიამოვნებდა ეს შეგრძნება, მაგრამ ვიცი, რომ ფეხბურთი ძალიან რთულია. ყველაფერი ისე ვერ წავა, როგორც შენ გსურს, უცებ რეალობას ეჯახები და ხვდები, რომ ეს ყველაფერი არც ისე მარტივია. ამ ლიგაში ძალიან ბევრი კარგი გუნდია, რაც გავალებს, რომ ყოველთვის კონცენტრირებული იყო."
"რამდენიმე მატჩში ბოლომდე კონცენტრირებულნი ვიყავით, თითოეული ჩვენგანის მიზანი მხოლოდ გამარჯვება იყო და ვფიქრობ, რომ ეს იდეალური იყო. მაგრამ ყველაზე მეტს მაშინ სწავლობ, როცა ამდენად რთული მომენტების გავლა გიწევს."
"ბუნებით ყოველთვის ოპტიმისტი ვიყავი. თუ ფორვარდი ხარ აუცილებლად ოპტიმისტი უნდა იყო. მცველები და მეკარეები, როგორც წესი, პესიმისტები არიან. მე ყოველთვის გოლის გატანის შანსს ვეძებდი და როცა მცველები შეცდომას უშვებდნენ, ეს არასდროს მაცოფებდა. ერთადერთ მიზნად ბურთის გატანა მქონდა და ყოველთვის ვიყენებდი ამ შანსს. ცხოვრებაშიც ასე ვიყავი, შესაძლებლობებს ვეძებდი და ვიყენებდი."