ანდერ ერერას განცხადებით, მისი კლუბი ჩემპიონთა ლიგას იმსახურებს და იმედოვნებს, რომ ოთხეულში შესვლას მოახერხებს.
ესპანელი "იუნაიტედის" ოფიციალურ ვებ გვერდს ესაუბრა: "ვაპირებთ, ვიბრძოლოთ. რა თქმა უნდა, ყველაფერი "ჩელსის" ხელშია, მაგრამ ჩვენ კვლავ მოსაპოვებელი გვაქვს 6 ქულა. იმედგაცრუებულნი ვართ, რადგან ლონდონელებთან გასულ კვირას საკმარისად კარგად ვითამაშეთ, რათა მოგვეგო, მაგრამ ამჟამად მიზნის მისაღწევად ორი მატჩიღა დაგვრჩა".
"ფეხბურთში ხანდახან გარკვეულ შედეგებს უნდა დაელოდო. ერთადერთი რისი გაკეთებაც შეგვიძლია, დარჩენილი ორი თამაშის მოგებაა. პირველ რიგში გასვლა "ჰადერსფილდთან". გასულ სეზონში იქ ვერ მოვიგეთ, ასე რომ კარგი გამოწვევაა".
"ჩემპიონთა ლიგაზე ეს გუნდი ყოველთვის უნდა იყოს. ეს ჩვენთვის ძალიან, ძალიან მნიშვნელოვანია. ლიგაზე თამაში და ტიტულების მოპოვება "იუნაიტედის" ისტორიას შეადგენს".
"წითელი ეშმაკები" ცხრილში მეექვსე ადგილს იკავებენ, 3 ქულით ჩამორჩებიან "ჩელსის", 1 ქულით კი მეხუთეადგილოსან "მეთოფეებს". დარჩენილია ორი ტური და დიდია ალბათობა "მანკუნიანელები" ბოლო ექვს სეზონში მეოთხედ დარჩნენ ოთხეულსა და ყველაზე პრესტიჟულ გათამაშებას მიღმა.