ბოლო დროს, ძალიან ბევრს საუბრობენ "მანჩესტერ იუნაიტედის" ფეხბურთელის პოლ პოგბას შესაძლო ტრანსფერზე. 26 წლის ნახევარმცველს მადრიდის "რეალს" უკავშირებენ, რასაც ადასტურებს ის ფაქტი, რომ ფრანგმა მადრიდულ კლუბში თამაშს ოცნება უწოდა.
ბრიტანულ საინფორმაციო წყაროებში გავრცელდა ინფორმაცია, სადაც პოლ პოგბას აგენტის მინო რაიოლას სახელი ფიგურირებს. თუკი გავრცელებულ ინფორმაციას დავეყრდნობით, რაიოლამ "რეალს" თავისი კლიენტის შესაძლო ტრანსფერის პირობები აცნობა.
ფრანგის აგენტი ხელფასის სახით 18 მილიონ ევროს ითხოვს, რის შემდეგაც პოგბა მადრიდული გუნდის სამ ყველაზე მაღალანაზღაურებად ფეხბურთელს შორის იქნება. მისი სატრანსფერო ღირებულება კი, სავარაუდოდ, 100 მილიონი ფუნტი იქნება.
შეგახსენებთ, რომ 26 წლის ფრანგი "მანჩესტერ იუნაიტედს" 2016 წელს, ტურინის "იუვენტუსიდან" შეუერთდა. ამ ხნის მანძილზე 87 შეხვედრა ჩაატარა და 24 გოლის გატანა მოახერხა. აქვე იმასაც გეტყვით, რომ მას "ეშმაკებთან" კონტრაქტი 2021 წლამდე აკავშირებს.