"მანჩესტერ იუნაიტედის" მწრთვნელი ოლე გუნარ სოლსკიაერი მინიმუმ ორ ცვლილებას გააკეთებს "ვესტ ჰემთან" მატჩის წინ.

მარჯვენა მცველი, ეშლი იანგი, "ოლდ ტრაფორდზე" ვერ გამოჩნდება, რადგან "ვულზვთან" მატჩში წითელი ბარათი მიიღო.

რაც შეეხება ლუკ შოუს, მან მიმდინარე სეზონში მეათე ყვითელი ბარათი მოაგროვა და შესაბამისად მასაც უწევს მატჩის გამოტოვება, როგორც "ვესტ ჰემთან", ისე "ევერტონთან".

სამწუხაროდ, ჩვენმა 23-მა ნომერმა ერთმატჩინი დისკვალიფიკაცია ჩემპიონთა ლიგაზეც მიიღო და "ბარსელონასთან" განმეორებით მატჩს ვერ ჩაატარებს.

რადგან არც იანგი და არც შოუ არ არიან, დიოგო დალო, სავარაუდოდ, მარჯვენა მცველის პოზიციაზე ითამაშებს, ხოლო მეორე ფლანგს მარკუს როხო დაიკავებს.

არგენტინელმა სანაკრებო შესვენებებზე ძალიან კარგად ითამაშა, რაც იმას გულისხმობს, რომ შესაძლოა ის "ნოუ კამპზეც" ვიხილოთ.

ანტონიო ვალენსია და მათეო დარმიანი ისევ ტრავმირებულები არიან.

რაც შეეხება დაცვის ცენტრს, ერიკ ბაიი თავის ტრავმის გამო, სავარაუდოდ, მზად ვერ იქნება. ის სანაკრებო შესვენებების დროს დაზიანდა. ოლე გუნარს მხოლოდ ვიქტორ ლინდელოფის, ფილ ჯონსისა და კრის სმოლინგის არჩევანი რჩება.

ნემანია მატიჩმა და ანდერ ერერამ სამშაბათის მატჩი გამოტოვეს და ჯერჯერობით კიდევ უცნობია, იქნება თუ არა დუეტი მზად "ვესტ ჰემის" დასახვედრად.

მატჩის შემდეგ პრესკონფერენციაში ოლე გუნარმა დაადასტურა, რომ ალექსის სანჩესი "ვესტ ჰემთან" ითამაშებს.

"მას ბევრი ტრავმა აწუხებდა, მაგრამ ახლა კარგად გრძნობს თავს. ახლა სრულიად ჯანმრთელია და გუნდთან ერთადაც ვარჯიშობს. ის, ალბათ, "ვესტ ჰემთან" მატჩში ითამაშებს, ვნახოთ რამდენად კარგად იქნება პირველი მატჩისთვის. ამის მიხედვით გადაწყდება, თუ რამდენ წუთს გაატარებს მოედანზე."

მარკუს რეშფორი "ბარსელონასთან" ძირითად შემადგენლობაში იყო და 85 წუთი ითამაშა, რაც ნიშნავს იმას, რომ მან კოჭის ტრავმა გადალახა და ვარჯიშები გააძლიერა.

ხუან მატა, ჯესი ლინგარდი და ენტონი მარსიალი სამივე სკამზე იმყოფებოდა და, სავარაუდოდ, ხვალისთვის სრულიად მზად იქნებიან.

ოლე სიახლეებს მატჩის წინა პრესკონფერენციაზე მოგვაწვდის.


წყარო: ManUtd.com