"მანჩესტერ იუნაიტედის" მწრთვნელმა აღიარა, რომ გაოცებული არ იქნება, თუ მატჩში ბევრ გოლს იხილავს. ნორვეგიელის განცხადებით, ამ მატჩს ყველა მოუთმენლად ელის.

მოუთმენლად ველით მესისთან შეხვედრას.

"რა გეგმა შეიძლება გქონდეს მსოფლიოში ნომერ პირველი ფორვარდის შესაჩერებლად? ვფიქრობ, ყველა მოუთმენლად ელის ამ მომენტს. მაგრამ ამ სეზონში ჩვენ უკვე დავუპირისპირდით "იუვენტუსს", სადაც რონალდუა, პსჟ-ს, სადაც მბაპეა, "ჩელსის", სადაც აზარია. სუარესი, კოუტინიო და მესი ჩვენს მცველებს დიდ პრობლემებს შეუქმნიან, ასე რომ ვნახოთ რა მოხდება."

პოგბა "იუნაიტედის" ფეხბურთელია.

"პოლი მოუთმენლად ელის ხვალინდელ დღეს, ის ერთ-ერთი ყველაზე დიდი შემსრულებელია. პსჟ-სთან ჩატარებული მატჩი მისი ყველაზე კარგი მომენტი არ იყო. ის ახლა მთლიანად "ბარსელონაზეა" კონცენტრირებული და ვერ ვხედავ მიზეზს იმისა, თუ რატომ არ დარჩება "ოლდ ტრაფორდზე" შემდეგ სეზონში."

მესის შეჩერება შეუძლებელი არ არის.

"ის მსოფლიოში ერთ-ერთი საუკეთესოა და ისტორიაში დიადი სახელით შევა, მაგრამ ეს იმას არ ნიშნავს, რომ მისი შეჩერება შეუძლებელია. ჩვენ მხოლოდ მესის არ ვეთამაშებით, ჩვენ 11 ფეხბურთელის წინააღმდეგ გვიწევს თამაში, ასე რომ ყველაზე უნდა ვკონცენტრირდეთ."

სპეკულაციები ვერაფერს დაგვაკლებს.

"ჩვენ ყველანი ამ თამაშზე ვართ კონცეტრირებულნი და კონტრაქტზე საუბრები ჩვენს განწყობას ვერ შეარყევს. ჩვენ ამ თამაშში ჩვენი იდეალური გულშემატკივრის გვერდში დგომა დაგვჭირდება. ვიცი, რომ გარემო ისეთივე საოცარი იქნება როგორც "ლივერპულსა" და პსჟ-სთან. სერ ალექსსაც ხშირად უსაუბრია ამაზე და ხვალინდელ საღამოს წვიმა კიდევ უფრო დაამშვენებს."

გვსურს, რომ 1999 წლის თამაშები გავიმეოროთ.

"ორივე გუნდს შესანიშნავი შემადგენლობა ჰყავს, როგორც ფორვარდები, ისე - მცველები. შეგახსენებთ 1999 წელს, სადაც 3-0-დან 3-3 დავასრულეთ და ორივე მატჩის ჯამში 6-6, შემდგომ კი პენალტების სერიით გავედით. ვფიქრობ, თუ იგივე განმეორდება ყველა ბედნიერი იქნება."

სერ ალექსს "ბარსელონას" შესახებ ვესაუბრე.

"მე ბევრი წელი გავატარე აქ და "ბარსელონასთანაც" დიდი გამოცდილება დავაგროვე. მე პატივს ვცემ და ვაღიარებ მათ გუნდსა და შესაძლებლობებს. რა თქმა უნდა, სერ ალექსთან მე ამ ყველაფერზე ვისაუბრე იმ წუთიდან, როცა "ბარსელონა" კენჭისყრაში გვხვდა წილად, მაგრამ დეტალების განხილვა არ მსურს."

ყველაფერი ბარსელონაში გადაწყდება.

"ეს მხოლოდ ერთი 90 წუთით არ გადაწყდება, შემდეგ ეტაპზე გასულის ვინაობა მეორე მატჩის ბოლომდე არ გვეცოდინება. რა თქმა უნდა, ჩვენ ყველაფერს ვეცდებით, რათა "ნოუ კამპზე" საქმე გავიმარტივოთ, მაგრამ ბოლო წუთამდე არაფერი დასრულდება."

პსჟ-სთან ბევრი ვისწავლეთ.

"ვფიქრობ, რომ თავდაჯერება მაღალია. ფეხბურთელებმა გულშემატკივარსაც რწმენა შემატა. რა თქმა უნდა, თამაშებს აგებ. წავაგეთ მატჩები, რომლის წაგებასაც არ ვიმსახურებდით, მაგრამ, ალბათ, არც რამდენიმე მატჩის მოგებას ვიმსახურებდით. სამწუხაროდ თუ საბედნიეროდ, შედეგს ყოველთვის ვერ აკონტროლებ. მე ვგრძნობ დაძაბულობას, ჟინს, ვნებას, მოუთმენლობას. ყველას სურს თამაში. პსჟ-ს მატჩის შემდეგ ბევრი რამე ვისწავლეთ და "ბარსელონასთვის" სულ სხვანაირად მოვემზადეთ."