"მანჩესტერ იუნაიტედის" ნახევარმცველმა, ანდერ ერერამ განაცხადა, რომ კლუბიდან თავისუფალი აგენტის სტატუსით წასვლის ზღვარზეა.
ოლე გუნარ სოლსკიაერის მოსვლის შემდეგ ერერა გუნდის ერთ-ერთ წამყვან ფიგურად იქცა. "იუნაიტედი" კი მასთან ახალი კონტრაქტის გაფორმებას ცდილობს, ვინაიდან მოქმედი ორ თვეში იწურება.
მაგრამ მცდელობა ჯერჯერობით მცდელობად რჩება და მხარეები დეტალებზე ვერ თანხმდებიან. პრესაში გავრცელებული ინფორმაციით, ერერა ხელფასის რაოდენობასა და კონტრაქტის ხანგრძლივობას ვერ ათანხმებს კლუბთან, რომელიც, შესაძლოა, თავისუფალი აგენტის სტატუსით დატოვოს, ვინაიდან მის მიმართ სხვა გრანდები იჩენენ ინტერესს.
თავად ერერა ორივე სცენარის განვითარებას ვარაუდობს: "მართალია, რომ მოქმედი კონტრაქტით მხოლოდ ორი თვე მრჩება და დღეისათვის მე და "იუნაიტედი" ერთნაირად არ ვფიქრობთ. არავითარი მოლაპარაკება არ არსებობს კონტრაქტის გახანგრძლივებასთან დაკავშირებით, მაგრამ "იუნაიტედს" უნდა მოვუსმინო.
ჩემთვის ცხადია მხოლოდ ის, რომ დიდ გუნდში ვითამაშებ. რა თქმა უნდა, "იუნაიტედს" მოვუსმენ, მაგრამ სხვა კლუბების ვარიანტსაც განვიხილავ. კარს არავის დავუკეტავ".